Әһли Бејт -АБНА- хәбәр аҝентлијинин вердији хәбәрә әсасән: Теһранда нәшр олунан “Шәрг” гәзети өзүнүн һәфтәлик бурахылышында ујдурма “ермәни сојгырымы”на ҝениш јер ајырыб, Азәрбајҹан, Түркијә вә Ермәнистан сәфирләринин мүсаһибәләрини јерләшдириб, 1915-ҹи ил һадисәләри вә Дағлыг Гарабағ мүнагишәси барәдә јерли тәһлилчиләрин мөвгејини дәрҹ едиб. Азәрбајҹан ХИН-ин мәтбуат хидмәтиндән верилән мәлумата ҝөрә, сахта “ермәни сојгырымы”на даир јер Иран Ислам Республикасынын мәтбуаты Түркијә вә Азәрбајҹанын да мөвгејини ҝениш ишыгландырды.
Азәрбајҹанын Иран Ислам Республикасындакы сәфири Ҹаваншир Ахундов мөвзуја даир фикирләрини конкрет фактлар үзәриндә гурараг Иран мәтбуатында ујдурма “ермәни сојгырымы”на јер ајрылдығыны, лакин ермәниләрин мүсәлманлара гаршы етдикләри вәһшиликләрә тохунулмадығыны, Хоҹалыда төрәдилмиш сојгырымдан бәһс едилмәдијини тәәссүфлә вурғулајыб. Биринҹи Дүнја мүһарибәси илләриндә јүз минләрлә түрк вә азәрбајҹанлынын ермәниләр тәрәфиндән гәтлә јетирилмәси фактына ҝөз јумулдуғуну билдирән сәфир, гәдим Азәрбајҹан торпагларында болшевикләр тәрәфиндән сүни шәкилдә Ермәнистан дөвләтинин јарадылдығыны нәзәрә чатдырыб. О, ермәни һәрби бирләшмәләри тәрәфиндән Бакы, Шамахы, Ҝәнҹә вә Губада 52 мин, Иран Ислам Республикасынын Азәрбајҹандилли Урмија, Хој, Салмас вә диҝәр шәһәрләрдә исә 120 мин ҝүнаһсыз инсанын өлдүрүлдүјүнү сөјләјиб.
Ҹ. Ахундов ермәниләрин башга јерләрдән, о ҹүмләдән Марағадан Дағлыг Гарабаға көчүрүлмәләриндән данышараг ермәниләрин Гарабаға көчмәсини тәрәннүм едән абидәнин учурулдуғуну дејиб. Сәфир гејд едиб ки, тарихи фактлара сөјкәнмәдән “ермәни сојгырымы”ндан бәһс етмәк, Османлы Империјасынын о заман үзләшдији тарихи реаллыглары нәзәрә алмадан фикир јүрүтмәк әсассыздыр. О, ермәниләрин ХХ әсрин сонларында, мүасир тарихимиздә Хоҹалыда төрәтдикләри вәһшиликләрин исә инсанлыға јарашмајан бир һәрәкәт олдуғуну, дүнјанын һеч бир јериндә белә вәһшилик төрәдилмәдијини бәјан едиб. Сәфир Дағлыг Гарабағ мүнагишәсинин јеҝанә һәллинин ишғалчы Ермәнистан һәрби бирләшмәләринин ишғал едилмиш торпаглардан чыхмасында, БМТ вә Авропа Шурасынын гәтнамәләринин јеринә јетирилмәсиндә, бејнәлхалг һүгуг нормаларына риајәт едилмәсиндә олдуғуну билдириб.
Диггәт: Хәбәрдән истифадә етдикдә мәнбәјә истинад лазымдыр
