Сон ҝүнләр һакимијјәтин нәзарәтиндә олан телеканалларда вә мәтбуат органларында мүхалифәтә гаршы апарылан кампанијанын формасы дәјишдирилиб. Инди нә “зәһмәткешләр” екранда, гәзет сәһифәләриндә ҝөрүнүр, нә дә мүхалифәтин хариҹи гүввәләрин дәстәји илә өлкәдә ара гарышдырмаг истәдији билдирилир. Хүсусилә мүхалифәт лидерләри илә 20 өлкәнин сәфиринин ҝөрүшмәси мәсәләси барәдә данышылмыр. Һалбуки бу ҝөрүшдән сонра һакимијјәт бүтүн потенсиалы илә сәфирләрә гаршы һүҹума кечмишди. Һәтта һөкумәтјөнлү депутатлар парламентин трибунасындан онларын өлкәдән говулмасы мәсәләсини ҝүндәмә ҝәтирмишди.
Иддиа олунурду ки, мәһз Гәрб даирәләри мүхалифәти өлкәдә “сабитлији позмаға” истигамәтләндирир. Сијавуш Новрузов һәтта иддиа едирди ки, өзү бунун шаһиди олуб.
Индисә бу ҝөрүшә ҝөрә Авропа Бирлији өлкәләрини, АБШ-ы топа тутан Баһар Мурадова, Әли Әһмәдов вә башга һөкумәтјөнлү депутатлар тамамилә башга һава чалырлар. Мүхалифәтин хариҹдә дајагларынын олмамасындан данышырлар.
Бәс бирдән-бирә нә олду ки, һакимијјәт әкс-тәблиғат формасыны дәјишди?
Һакимијјәтә јахын експертләр буну ики сәбәблә изаһ едирләр.
Биринҹиси, ола биләр ки, һакимијјәтин мөвгејинин дәјишмәсиндә АБШ сәфири Метју Брајзанын фөвгәладә һаллар назири Кәмаләддин Һејдәровла мүәммалы ҝөрүшү рол ојнајыб: “Ҝөрүнүр, фөвгәладә һаллар назири дә Ылһам Әлијеви инандыра билиб ки, һакимијјәтин мөвгеји јанлышдыр. Нәзәрә алмаг лазымдыр ки, мүхалифәтә гаршы кампанија Президент Администрасијасынын рәһбәри Рамиз Меһдијевин мүәллифлији илә һәјата кечирилирди. Һәм сизин ”зәһмәткеш" адландырдығыныз инсанларын телеканаллара чыхарылмасы, һәм дә мүхалифәтә гаршы кампанијанын фонунда Гәрбин дә һәдәфә алынмасы Рамиз Меһдијевин идејасы иди. Биринҹи, онун коммунист номенклатурасынын нүмајәндәси олмасындан, икинҹи исә игтидарда русијапәрәст гүввәләрин башында дајанмасындан ирәли ҝәлир. Ола биләр ки, Метју Брајзанын һакимијјәтдә икинҹи бөјүк ҝүҹ олан вә Рамиз Меһдијевлә гаршыдурма шәраитиндә олан Кәмаләддин Һејдәровла ҝөрүшмәси дә бунунла бағлыдыр".
Експертләрин фикринҹә, икинҹи сәбәб бу ола биләр ки, артыг һакимијјәтдә мүхалифәтә гаршы бу шәкилдә кампанија апарылмасынын Илһам Әлијевин әлејһинә ишләмәсини баша дүшүрләр: “Бу кампанијанын ҹәмијјәтдә икраһ һисси доғурдуғу сосиал шәбәкәләрдә, ајры-ајры сајтларда јазылан шәрһләрдән дә ајдын ҝөрүнүр. Ҝөрүнүр, игтидар идеологлары да өзләри үчүн ајрыҹа арашдырма апарыблар вә нәтиҹә онларын хејринә олмајыб. Мүхалифәтин Гәрб даирәләри илә әлагәләндирилмәси исә һакимијјәтин даһа чох әлејһинә ишләјиб. Бу, бир гәдәр үмидсиз олан инсанлары да мүбаризәјә руһландырыб. Ҝүман ки, нәһајәт һакимијјәт буну анлајыб вә кампанијанын формасыны дәјишмәк гәрарына ҝәлиб”.
