Әһли Бејт -АБНА- хәбәр аҝентлијинин вердији хәбәрә әсасән: Тәһлүкәсизлик хидмәтинин ҝенерал-мајору Мәһәммәд әл-Катиб билдириб ки, президент өвладлары Гаһирәдә нәзарәт алтында сахланыр. Һүснү Мүбарәк өзү исә һазырда Шарм-әл-Шејхдә бејнәлхалг һоспиталдадыр. 82 јашлы сабиг президент јүксәк ган тәзјиги вә үрәк ритминин позғунлуғу диагнозу илә хәстәханаја јерләшдирилиб. Мисир Баш Прокурорлуғунун әмәкдашлары хәстәханада онун ифадәсини алыблар, даһа сонра сабиг дөвләт башчысына оғланлары илә телефон әлагәси јаратмаг имканы верилиб.
Ики ҝүн әввәл кечид һөкумәтинин дахили ишләр назири Мансур әл-Исави сабиг президент вә оғулларына мәһкәмәјә ҝәлмәк барәдә чағырыш ҝөндәрилдијини дејиб. Мүбарәк вә өвладлары ганунсуз јолла сәрвәт әлдә етмәкдә, коррупсијада ҝүнаһландырылыр. Онларын хариҹи банклардакы һесаблары арашдырылыр.
Диггәт: Хәбәрдән истифадә етдикдә мәнбәјә истинад лазымдыр.
