Әһли Бејт -АБНА- хәбәр аҝентлијинин вердији хәбәрә әсасән: Дүнән Иҹтимаи Палата илк мөһтәшәм аксијасыны кечирди. Гурума дахил олан партијаларын лидерләри, тәмсилчиләри, зијалылар, еләҹә дә ҝәнҹләр Шәргдә илк демократик ҹүмһуријјәтин баниси Мәһәммәд Әмин Рәсулзадәнин анадан олмасынын 127-ҹи ил дөнүмү мүнасибәти илә онун Новханы кәндиндәки һејкәли өнүнә издиһамлы јүрүш етдиләр.
Гәсәбәнин ҝиришиндән башлајан аксијада јүзләрлә инсан иштирак едирди. Аксијаја кәнд сакинләри дә гошулмушдулар. Тәдбир башламаздан өнҹә әразијә хејли сајда полис гүввәләри ҹәлб олунмушду. Аксија иштиракчыларынын бәзиләринин әлләриндә “Бен Али, нехт Илһам Али”, “Мүсават или вә Тунис или”, “ Истиглал вә Ҹүмһуријјәт!” шүарлары јазылмыш плакатлар тутмушдулар. Бу мүддәтдә полис аксијаја мүдахилә етмәди.
Рәсулзадәнин абидәси өнүндә дүзәнләнмиш тәдбирдә исә нүмајишчиләрин сајы дәфәләрлә чохалды. Тәдбири ҝириш сөзү илә ачан Мүсават Партијасы Мәркәзи Иҹра Апаратынын рәһбәри Ариф Һаҹылы бу тарихин әһәмијјәтиндән данышды, халгы бајрам мүнасибәти илә тәбрик етди: “Бөјүк Рәсулзадә вә онун тәрәфдарлары 100 ил бундан өнҹә Мүсават Партијасыны јаратдылар. Азәрбајҹана мүсаватчылыг идеолоҝијасыны, ҹүмһуријјәтчилији, даһа сонра исә ҹүмһуријјәти ҝәтирибләр. Һәлә о заман дүнјада ҹәми 12 демократик ҹүмһуријјәт вар иди. Бу ҝүн исә онларын сајы 70-дир”.
Сонра сөз гурумун Координасија Шурасынын үзвү Агил Сәмәдбәјлијә верилди. А.Сәмәдбәјли Рәсулзадәнин руһунун нараһат олдуғуну деди: “Чүнки өлкәмиз демократија мәсәләсиндә 196 өлкә арасында 172-ҹи јердәдир. Азәрбајҹан халгы буна лајиг дејил. Өндәрин бир давасы олуб, о да Азәрбајҹанымызын истиглалы вә милләтин хошбәхтлијидир...”
Тарихчи-алим Ҹәмил Һәсәнли исә Рәсулзадә идејаларынын халгымыза вердији дәјәрли төһфәләрдән сөз ачды: “Рәсулзадә халгы милли дирилик нәзәријјәси илә силаһландыран илк лидердир. Тарихимиздә Ислам һүммәтиндән түрк милләтчилијинә кечид онун ады илә бағлыдыр. Биринҹи дүнја мүһарибәси әрәфәсиндә онун “Дирилик” журналында чап олунмуш “Милли дирилик” силсиләси милләтимизин һәдәфләрини мүәјјән етмишди. Азәрбајҹан зијалыларынын бөјүк истиглал арзусу варды ки, милләтинин имзасы дүнја халглары имзасы ичиндә олсун. Бу имзаны атан мәһз Рәсулзадә олду”.
Координасија шурасынын диҝәр үзвү, АХП сәдри Пәнаһ Һүсејн чыхышында Рәсулзадәнин халгымыза әманәт гојуб ҝетдији ән бөјүк әсәрин Азәрбајҹан олдуғуну сөјләди: “Бу, һәмин өлкәдир ки, Шәргдә илк демократик ҹүмһуријјәт нүмунәси гојуб. Халгымызын истәјини ифадә едәрәк дејирәм ки, Рәсулзадә- Елчибәј вәсијјәтләрини, идејаларыны давам етдирәрәк өлкәмизи демократијаја чатдыраҹағыг”. П.Һүсејн Мисир фирону Һүснү Мүбарәкин Хырдаландакы һејкәлинин ҝөтүрүлмәсини тәләб етди: “Азәрбајҹанда гәддар, феодал тәфәккүрлү Һүснү Мүбарәкин һејкәли гојулуб. Бу азмыш кими, онун ханымынын адыны дашыјан мәктәб дә вар. Биз тәләб едирик ки, һәмин һејкәл вә мәктәбин ады орадан ҝөтүрүлсүн”.
Мүсават Партијасынын башганы Иса Гәмбәр партијанын 100 иллик јубилејиндә силсилә тәдбирләрин давам едәҹәјини сөјләди: “Азәрбајҹан халгыны тәбрик едирик. М.Ә.Рәсулзадә бүтүн өмрүнү халгымызын азадлығына вә инкишафына, һәср едиб. Онун һәјат вә јарадыҹылығы һамыја өрнәк олмалыдыр. Дүнән ахшам дүнјанын бир чох јерләриндән бизә тәбрик зәнҝләри олуб. Рәсулзадәнин төһфәләриндән бири дә Мүсават Партијасыдыр. Бу ил партијанын 100 јашы тамам олур. Она ҝөрә дә јубилеј комитәси јаратмышыг. Комитәнин фәхри сәдрләри профессор Ширмәммәд Һүсејнов вә Азәрбајҹан Күлтүр Дәрнәјинин сәдри Ҹәмил Үналдыр. Һәр ики шәхсијјәтә тәшәккүр едирәм. Бу тәдбирләр ил боју давам едәҹәк”.
И.Гәмбәр тәбии ки, әрәб өлкәләриндәки гијамлардан да данышды. О, ингилабын өлкәмизә дә ҝәлиб чатаҹағыны деди: “Дүнја дәјишдикҹә, Азәрбајҹан да дәјишмәлидир. Ҝүҹүмүз вар ки, бу или өлкәдә көклү демократик дәјишикликләрин башланғыҹы кими тарихә јаздыраг. 1918-ҹи илдә Рәсулзадә ҹүмһуријјәт гуруб, 1991-ҹи илдә Елчибәјин лидерлији илә бу мүстәгиллик бәрпа олунуб. Һәр ики дәфә гара гүввәләр тарихин истигамәтини дәјишмәјә чалышыблар. Артыг елә дәјишикликләр башламалыдыр ки, Рәсулзадә дүшмәнләри јох, ону севәнләр өз һакимијјәтләрини формалашдырсынлар. Халгын формалашдырдығы һакимијјәт өлкәнин проблемләрини һәлл, әрази бүтөвлүјүнү бәрпа етсин, мүстәгиллијини јашатсын. Азәрбајҹан халгы буна гадир вә лајигдир. Бу ил Ислам дүнјасында бөјүк дәјишиклик јашаныр. Мисирдә ингилабы просес ҝедир, мүбаризә ҝедир, јүзләрлә инсан өлдүрүлүр. Өлкәмизин Мисирдәки сәфирлијинин ҝәнҹ әмәкдашы да өлдүрүлүб. Буну авторитаризмин јени мәрһәләдә илк гурбаны да һесаб етмәк олар. Биз өлкәмиздә просесләрин динҹ мәҹрада ҝетмәси үчүн үмумхалг бирлијини тәмин етмәлијик. Мәһз бу мәгсәдлә Иҹтимаи Палата јаратмышыг. Инанырам ки, ән ҝөркәмли хадимләр, мүтәхәссисләр кәнарда галмајаҹаг. Иҹтимаи Палата өлкәнин мәсулијјәтини өз үзәринә ҝөтүрмәји бәјан едиб”.
АХҸП сәдри Әли Кәримли чыхышына һакимијјәтин Рәсулзадәјә гысганҹ мүнасибәтиндән башлады: “Рәсулзадә елә шәраитдә дөвләт гуруб ки, мүсәлман өлкәләриндә нәинки демократија, һеч мүстәгиллик јох иди. Белә дурумда гуруҹу бабаларымыз јохдан дөвләт јаратдылар. Јохса бизим дә талејимиз Дағыстан вә башга гафгаз халглар кими оларды. Индики һакимијјәтин Рәсулзадәјә биҝанә, нанкор мүнасибәтинә етираз етмәлијик. Гој онлар бүтләрини, шәкилләрини телевизијаларын күнҹүнә јапышдырсынлар. Рәсулзадә бизим гәлбимиздәдир вә силә билмәзләр”.Тәдбирин сонунда Рәсулзадә ирсинин давамчысы, өндәрин нәвәси Рәис Рәсулзадә һамыја тәшәккүрүнү билдирди. Ардынҹа Рәсулзадәнин Новханыдакы гәбиристанлыгда ујујан јахынлары зијарәт едилди, онларын руһуна дуалар охунду.
Диггәт: Хәбәрдән истифадә етдикдә мәнбәјә истинад лазымдыр
