Әһли Бејт -АБНА- хәбәр аҝентлијинин вердији хәбәрә әсасән: Чевик Полис Алајы әмәкдашлары тәрәфиндән дөјүләрәк өлдүрүлән Елвин Әсҝәровун анасы Роза Рәфијева вә һүгуг мүдафиәчиси Видади Исҝәндәров мәтбуат конфрансы кечириб. Медиа нүмајәндәләринин вә садә инсанларын иштиракы илә кечән мәтбуат конфрансында, мәрһумун валидејни Роза Рәфијева, оғлунун гатилләринин ҹинајәт мәсулијјәтинә ҹәлб олунмасыны тәләб едиб. О, өлкә башчысына, милләт вәкили Меһрибан Әлијеваја, Милли Тәһлүкәсизлик Назирлијинә, Дахили Ишләр Назирлијинә, Баш Прокурорлуға, омбудсмана мүраҹиәт дә үнванлајыб.
Гејд едәк ки, Р.Рәфијева оғлунун ҹинајәткар аләмлә әлагәси олмасы барәдә ҝәзән шајиәләри тәкзиб едиб вә бунлары ағ јалан адландырыб. “Дејирләр ки, ҝуја Елвинин әлиндәки бычаг полисләрдән биринин ағзынын бир тәрәфиндән ҝириб о тәрәфдән чыхыб. Анҹаг полисләр үмумијјәтлә хәсарәт алмајыб. Тәләб едирик ки, оғлумун гатилләри ҹәзаландырылсын”.
Мәтбуат конфрансында чыхыш едән һүгуг мүдафиәчиси Видади Исҝәндәров исә прокурорлуғу гејри-објектив истинтаг апармагда сучлајыб: “Ән бөјүк ҹинајәти прокурорлуг едиб. Ортада полис ағыр ҹинајәт төрәдиб. Амма преседент олмасын дејә һәмин полисләр ҹинајәт мәсулијјәтинә ҹәлб олунмур. Әвәзиндә гәтлә јетирилән һагда ҹинајәт иши ачылыр".
Диггәт: Хәбәрдән истифадә етдикдә мәнбәјә истинад лазымдыр
