Әһли Бејт -АБНА- хәбәр аҝентлијинин вердији хәбәрә әсасән: Гафгаз Мүсәлманлары Идарәсинин (ГМИ) рәһбәрлији вә Газиләр Шурасы орта мәктәбләрдә һиҹаб ҝејинилмәсинин гадаған едилмәси мәсәләси илә бағлы фитва вериб. Бу барәдә Азәрбајҹан Ислам Университетинин ректору Сабир Һәсәнли билдириб.
“Биз өлкәнин ганунларына һөрмәт едир вә мөмин вәтәндашлары да бу ганунлара һөрмәт етмәјә чағырырыг. Сөһбәт орта мәктәбләрдә һиҹаб тахмагдан ҝедир вә бу мәсәләдә дөвләт дә, Тәһсил Назирлији өз мөвгеләрини конкрет олараг ифадә едибләр. ГМИ-јә ҝәлдикдә исә о, елә, дөвләтин мөвгејиндән чыхыш едир”,- дејә ректор вурғулајыб.
О һәмчинин гејд едиб ки, бу мәсәлә әтрафында мүзакирә јәгин ки, мүхтәлиф мәрһәләләрдә кечириләҹәк.
“Һиҹаб мәктәбли формасына әлавә елемент кими дахил едилә биләр. Мәсәлән, ушағынын хәстәләнмәсини истәмәјән валидејн гызынын башына өртүк кечирир вә мәктәбә јола салыр. Бурада һеч бир ҹинајәт јохдур. Лакин әҝәр мәктәб директору тәләб етсә ки, конкрет олараг һиҹаб тахылмасын, беле һалда ҝәрәк гадағаја риајәт олунсун”,- дејә С.Һәсәнли билдириб.
Хатырладаг ки, Гафгаз Мүсәлманлары Идарәсинин сәдри шејхүлислам Аллаһшүкүр Пашазадә мәктәбләрдә јар алан һиҹаб мәсәләсилә бағлы мөвгејини "Туран"а ифадә едәркән билдириб: “Һиҹаб мәсәләси мүзакирә објекти дејил, бу, Аллаһын әмридир вә она әмәл олунмалыдыр”. Шејхүлислам А.Пашазадә һиҹабын динин атрибутларындан бири олдуғуна диггәт чәкәрәк, буна әмәл олунмасынын ваҹиблијини сөјләјиб. Онун ҝејилмәсинә ҝәлдикдә, Шејхүлислам һиҹабын мәктәб формасы илә узлашмасына диггәт чәкмишдир: “Һиҹабын олуб-олмамасы јох, онун һансы шәкилдә олмасы мүзакирә едилә биләр”, - дејә ГМИ сәдри билдириб.
Һәмчинин ГМИ сәдринин сөзҹүсү Рәһимә Дадашова "Мазлумдер" рәсмиләри илә ҝөрүш заманы Шејхин илк ачыгламасына диггәт чәкмәси вә о ачыгламаны дәстәкләмәси, ГМИ дахилиндә парчаланма вә ја ГМИ рәһбәрлијинә һансыса тәзјигләрин едилмәси еһтималындан хәбәр верир.
Диггәт: Хәбәрдән истифадә етдикдә мәнбәјә истинад лазымдыр
