Әһли Бејт -АБНА- хәбәр аҝентлијинин вердији хәбәрә әсасән: Јанварын 11-дә Губа шәһәриндәки евиндән силаһ тапылдығы дејилән, Азәрбајҹан Ислам Партијасынын сәдри Мөвсүм Сәмәдовун гајыны Фирдовси Мәммәдрзајеви полис сахлајыб.
Јанварын 13-дә “Медиа форум” сајтына ачыглама верән Фирдовси Мәммәдрзајевин һәјат јолдашы Мәтанәт Мәммәдрзајева дејиб: “Дүнән Бакыдан гајыдандан сонра Фирдовсини евин һәјәтиндә полис сахлады. Бизә дедиләр ки, һәләлик ону бир ҝүнлүк Губа полисиндә сахлајаҹаглар. Бу ҝүн ахшам ону Бакыја апармалыдырлар”.
Фирдовси Мәммәдрзајев вә һәјат јолдашы полис евдә ахтарыш апараркән Бакыда һәкимдә олублар: “Дүнән сәһәр саатларында Губаја дөндүк. Биз Бакыда оланда Губа полисиндән Фирдовсијә зәнҝ ҝәлди ки, һарадасан? Фирдовси Бакыда олдуғуну, тез заманда гајыдаҹағыны деди. Лакин аз кечмәди ки, евдә галан ортанҹыл оғлум зәнҝ еләди ки, ата, евә полис ҝәлиб, дејир ахтарыш апармаг истәјирик.
Оғлум данышыр ки, әввәл дөрд-беш нәфәр ичәри ҝирди. Онлар бирбаша бизим јатаг отағымыза ҝириб. Отағын бир тәрәфиндә јорған-дөшәк јүкү јығмышам. Силаһ дедикләри дә һәмин јүкүн үстүндән чыхыб. Һалбуки мән сәһәр тездән һәмин јүкү јығыб евдән чыхмышам. Евимдә јенијетмә, һәмчинин көрпә ушаг вар. Икиотаглы, дар мәнзилдә мән, јахуд һәјат јолдашым силаһ, гумбара неҹә сахлаја биләр?
Оғлум данышыр ки, јатаг отағына ҝирән полис тез дә ҝери гајыдыб вә бундан сонра јахынлыгда гоһум-әгрәбадан кимин јашадығыны сорушуб. Белә баша дүшүрүк ки, полис өзү силаһы ичәри гојуб вә чыхыб. Оғлум әмисини чағырандан сонра полис ҝуја әсл ахтарыша башлајыб. Бу заман евә о гәдәр полис төкүлүб ҝәлиб ки... Гоншулар дејир ки, полис машыны вә полис нәфәри әлиндән күчәдә тәрпәнмәк мүмкүн олмурду”.
Мәтанәт Мәммәдрзајева мәнзилиндә елә дә дәриндән ахтарыш апарылмадығыны дејиб: “Садәҹә, ораны-бураны ешәләјибләр. Ҝуја диванын алтына бахыблар. Шкафлара бахыблар. Сонда да сарафандакы силаһ-сурсаты гонаг отағындакы столун үстүнә гојублар ки, тапдыг. Әввәл оғлума, әмисинә шаһид кими имза атмаларыны тәләб едибләр. Амма онлар разы олмајыб, шаһид дурмајыблар. Мәҹбурән гоншулара имза атдырыблар.
Әҝәр мән силаһ сахлајанамса, ону нијә јүкүн үстүнә гојуб Бакыја ҝедирдим? Ону зирзәмидә, даһа ҝизлин јердә ҝизләдәрдим дә... Ја о гәдәр авамыг ки, Мөвсүм бәјин сахландығыны ҝөрүб мәним дә евимдә ахтарыш апарылаҹағыны әввәлҹәдән прогнозлашдыра билмәдим? Силаһы апарыб ҝизләдәрдим дә, ону ачыгда нијә гојурдум ахы? Бу һагсызлыг вә әдаләтсизликдир, мөмин бир шәхсә бөһтан атырлар”.
Рәсми мәлумата ҝөрә, Фирдовси Мәммәдрзајевин евиндән вә һәјәтиндәки истиханадан исә 10 әдәд “Ф-1” әл гумбарасы вә онлар үчүн алышдырыҹылар, 40 әдәд автомат патрону вә автомат силаһы үчүн 1 әдәд дараг ашкар едилиб ҝөтүрүлүб.
Диггәт: Хәбәрдән истифадә етдикдә мәнбәјә истинад лазымдыр
