Әһли Бејт -АБНА- хәбәр аҝентлијинин вердији хәбәрә әсасән: Бу барәдә Мүсават башганынын мүавини Тофиг Јагублу мәлумат вериб.
Онун сөзләринә ҝөрә, сечкидә баш верәнләрә етираз олараг блок нојабрын 9-да Бакы шәһәриндә митинг кечирмәк үчүн Бакы шәһәр Иҹра Һакимијјәтинә мүраҹиәт едиб. Мүраҹиәтдә аксијаларын кечирилмәси үчүн бир сыра јерләр тәклиф олунса да, шәһәр рәһбәрлији бу ҝүн мүраҹиәтә рәдд ҹавабы вериб.
Партија рәсмиси ону да әлавә едиб ки, АХҸП-Мүсават блокунун бундан сонра да күтләви аксијаларын кечирилмәси гәрары гүввәдә галыр вә јенә шәһәр рәһбәрлијинә мүраҹиәт олунаҹаг.
Хатырладаг ки, бу ҝүн парламент сечкиләринин нәтиҹәләринә даир мәтбуат конфрансы кечирән Мүсават вә АХҸП сәдрләри Иса Гәмбәр вә Әли Кәримли күтләви етираз аксијаларынын тәшкили мәсәләләринин нәзәрдән кечирилдијини ачыглајыблар
АХҸП-Мүсават блоку Бакы шәһәр Иҹра Һакимијјәтинә мүраҹиәтиндә Гара Гарајев проспектиндә «Прага» ресторанынын гаршысындан башлајараг «Тәбриз» кинотеатрынын гаршысына гәдәр јүрүш вә «Тәбриз» кинотеатрынын гаршысында митингин кечирилмәси, 20 нөмрәли мәктәбдән башлајараг, Парламент проспектиндән кечмәклә Һүсејн Ҹавид бағына гәдәр јүрүш вә митинг, Сабир бағындан башлајараг Азәрбајҹан күчәсиндән кечмәклә Фүзули мејданына гәдәр јүрүш вә митинг, Сәмәд Вурғун бағы, Ҹәфәр Ҹаббарлы мејданы, Нәриманов адына кинотеатрын гаршысындакы паркда, Диларә Әлијева күчәси вә Шәмси Бәдәлбәјли күчәләри арасында, «Республика» сарајынын гаршысындакы паркда, Президент Администрасијасынын, Бакы шәһәр Иҹра Һакимијјәтинин вә Назирләр Кабинетинин биналарындан 200 метр радиусда истәнилән әразидә аксија кечирмәк нијјәтиндә олдуғуну билдириб.
Диггәт: Хәбәрдән истифадә етдикдә мәнбәјә истинад лазымдыр
