Әһли Бејт -АБНА- хәбәр аҝентлијинин вердији хәбәрә әсасән: Нојабрын 4-дә Ермәнистандан әсирликдән гајыдан мүлки вәтәндаш Елдар Тағыјев сәһһәтинин мүајинә олунмасы үчүн карантин нәзарәтә ҝөтүрүлүб. О, Товуз Мәркәзи Рајон Хәстәханасынын Инфексион Шөбәсинә јерләшдирилиб. Е. Тағыјевин сәһһәтиндә илкин олараг ағыр инфексион хәстәликләрин ашкарланмадығы билдирилир.
1 илә јахын Ермәнистанда әсирлик олан Товуз рајон Әлибәјли кәнд сакини Елдар Тағыјев неҹә әсир дүшдүјү вә әсирлик ҝүнләри барәдә ачыглама вериб.
О, өтән ил декабрын 28-дә Әлибәјли кәндинин Ермәнистанла сәрһәддә јерләшән, Азәрбајҹана аид әразисиндә чајда балыг тутаркән әсир дүшдүјүнү билдириб: “Сәһәр саатларында чајда балыг тутмаға ҝетдим. Бир нечә балыг тутдугдан сонра әлим үшүдү, кәнарда отуруб сигарет чәкдим. Икинҹи сигарети чәкәндә ермәниләр үстүмү алдылар. Онлардан 2-си силаһлы, 1-и силаһсыз иди. Әлими бағлајыб машына гојуб апардылар. Әввәлҹә Иҹеван рајонуна, ики ҝүн сонра исә Јеревана апарылдым”.
Е. Тағыјев әсирликдә олан заман она о гәдәр дә чох әзијјәт вә ишҝәнҹә верилмәдијини билдириб: “Мәни Јеревана апардыгдан сонра Бејнәлхалг Гызыл Хач Комитәсинин нүмајәндәләри ҝәлдиләр. Онлар мәнимлә сөһбәт етдиләр, аиләмә мәктуб јаздым. Онлар мәнә јарадылан шәраитлә, јатмағымла, јемәјимлә - һәр сејлә марагландылар. Буна ҝөрә дә әсирликдә олдуғум заман мәни о гәдәр дә инҹитмирдиләр”.
Е. Тағыјев Јереванда оланда, орада ондан башга даһа ики азәрбајҹанлы әсирин олдуғуну да өјрәниб: “Камерадан чыхарыланда һәмин әсирләрлә данышмаг истәсәм дә, ермәниләр мане олурдулар. Бунунла белә, өјрәндим ки, онлардан бири Ҝоранбој, диҝәри исә Ағдам рајонундандыр. Ағдам рајонундан олан әсири бу илин мајында азад етдиләр. Ҝоранбојдан олан әсир исә һәлә дә ордадыр”.
О, әсирликдә олан заман мәҹбур едиләрәк Ермәнистанын Иҹтимаи Телевизијасына чыхарылдығыны дејиб: “Онлар мәни мәҹбур етдиләр ки, телевизијаја чыхарыб, Азәрбајҹанда јашајыш шәраитинин чәтинлији, газын, ишығыны олмамасы, һөкумәт тәрәфиндән һеч бир јардым едилмәмәси, бир сөзлә, әһалинин бәрбад вәзијјәтдә јашадығыны сөјләјим. Онлар мәнә тәзјиг етдиләр, дедиләр ки, бунлары демәсәм башыма пис ојунлар ҝәтирәҹәкләр”.
Е. Тағыјев президент Илһам Әлијевә сон Һәштәрхан ҝөрүшү илә әлагәдар тәшәккүрүнү билдириб: “Бизи ҹәнаб президентин имзаладығы бәјаннамә сајәсиндә азад етдиләр. Бу ҝүн өзүмү јенидән дүнјаја ҝәлмиш кими һисс едирәм”.
Товуз Мәркәзи Рајон Хәстәханасынын Инфексион Шөбәсиндән верилән мәлумата ҝөрә, әсирликдән гајытмыш Елдар Тағыјев бүтүн тибби мүајинәләрдән кечирилиб. Онун һәр һансы инфексион хәстәликләрин дашыјыҹысы олуб-олмадығыны јохламаг үчүн бүтүн анализләр верилиб. Анализләрин ҹавабы бир нечә ҝүндән сонра мәлум олаҹаг.
Гејд едәк ки, Е. Тағыјев нојабрын 4-дә әсирликдән гајтарылыб.
Диггәт: Хәбәрдән истифадә етдикдә мәнбәјә истинад лазымдыр
