Әһли Бејт -АБНА- хәбәр аҝентлијинин вердији хәбәрә әсасән: Әмәлијјат Азәрбајҹанын Газах вә Ермәнистанын Иҹеван шәһәрләри арасындакы јолда баш тутуб. “Биз бүтүн тәрәфләрдә гоһумлары сахланылан, иткин дүшмүш вә ја вәфат етмиш аиләләрлә јахындан әлагә сахлајырыг вә онларын һәјәҹан вә кәдәрләринә шәрик чыхырыг. Гүссәли хәбәрин чатдырылмасы вә ја өлмүш ҹәсәдин репатриасијасы чох кәдәрләндириҹи һалдыр".
Мәлуматда һәмчинин билдирилир ки, БГХК Дағлыг Гарабағ мүнагишәси илә бағлы сахланылан һәрби әсирләрә вә мүлки шәхсләрә даим баш чәкир. Нејтрал васитәчи гисминдә чыхыш едән БГХК, һәмчинин аидијјәти олан тәрәфләрин разылығы илә һәмин шәхсләрин вә еләҹә дә ҹәсәдләрин репатриасија едилмәсинә көмәклик ҝөстәрир. Кечән илин апрел ајында БГХК бир Азәрбајҹан әсҝәринин вә ики Азәрбајҹан вәтәндашынын галыгларынын гајтарылмасына јардым едиб. Тәшкилат, һазырда тәмас хәттинә јахын олан әразидә шәһид олмуш ики Азәрбајҹан әсҝәринин ҹәсәдләри дә дахил олмагла, һәр ики тәрәфдә олан диҝәр мүлки шәхсләрин вә инсан галыгларынын гајтарылмасы үзрә апарылан данышыглара ҹәлб олунуб.
Даһа сонра гејд олунуб ки, БГХК, јалныз сахланылан шәхсин өз арзусу илә өлкәсинә ҝери гајытмаг истәдијини тәсдиг етмәсиндән сонра гајтарылмага јардым едир".
Гејд едәк ки, Ермәнистан тәрәфиндән әсир ҝөтүрүлән Елдар Тағыјев бу ҝүн Азәрбајҹана тәһвил верилиб. Просес Азәрбајҹан-Ермәнистан гошунларынын Газах рајонунун Бала Ҹәфәрли кәнди јахынлығындакы тәмас хәттиндә, Газах-Иҹеван јолунун үзәриндә јерләшән нејтрал зонада һәјата кечирилиб. Азәрбајҹан исә ермәни һәрбчи Манвел Мамиконович Сарыбекјанын мејитини Ермәнистана тәһвил вериб.
Просесдә Әсир вә иткин дүшмүш, ҝиров ҝөтүрүлмүш вәтәндашларла әлагәдар Дөвләт Комиссијасынын нүмајәндәләри, Бејнәлхалг Гызыл Хач Комитәсинин әмәкдашлары (БГХК) иштирак едибләр.
Товуз рајон Әлибәјли кәнд сакини, 1963-ҹү ил тәвәллүдлү Тағыјев Елдар Һејдәр оғлу 2009-ҹу ил декабрын 28-и, саат 18.00 радәләриндә Товуз рајонунун Әлибәјли кәнди истигамәтиндә, тәмас хәттинин јахынлығында атәшә тутулуб, даһа сонра ермәни һәрбчиләри тәрәфиндән ҝиров ҝөтүрүлүб.
Манвел Сарыбекјан бу ил сентјабрын 11-дә ҹәбһәнин шимал-гәрб истигамәтиндә бир нечә нәфәрдән ибарәт олан ермәни тәхрибат групунун гаршысы алынаркән кәшфијјатчыја аид олан бир сыра ләвазиматларла бирликдә јахаланыб. О, октјабрын 5-дә ҝеҹә саат 3-дә
мүвәггәти сахлама јериндә көјнәји илә јатаг мәләфәсини бир-биринә дүјүнләјәрәк өзүнү асыб.
Диггәт: Хәбәрдән истифадә етдикдә мәнбәјә истинад лазымдыр
