Әһли Бејт -АБНА- хәбәр аҝентлијинин вердији хәбәрә әсасән: Просес Азәрбајҹан-Ермәнистан гошунларынын Газах рајонунун Бала Ҹәфәрли кәнди јахынлығындакы тәмас хәттиндә, Газах-Иҹеван јолунун үзәриндә јерләшән нејтрал зонада һәјата кечирилир. Һадисә јериндән верилән мәлуматына ҝөрә, саат 12.00 радәләриндә Азәрбајҹан тәрәфини тәмсил едән шәхсләр, Бејнәлхалг Гызыл Хач Комитәсинин әмәкдашлары (БГХК) әсири тәһвил алмаг үчүн тәмас хәттинин гаршы тәрәфинә кечибләр.
Мәтбуат нүмајәндәләринә просесин баш вердији әразијә бурахылмајыб.
Ермәнистанда әсирликдә сахланылан Товуз рајон сакини Елдар Тағыјевин гоһумлары да тәмас хәттинә ҝәлибләр. Амма һәләлик әсирликдән гајтарылан шәхсин ким олдуғу билинмир.
Гејд едәк ки, дүнән “Новости-Армениа” сајты Ермәнистан Мүдафиә Назирлијинә истинадән Ермәнистан сәрһәдини гејри-гануни кечән Азәрбајҹан вәтәндашынын бу ҝүн тәһвил вериләҹәји барәдә мәлумат јајыб. Мәлуматда тәһвил вериләҹәк шәхсин ады ачыгланмајыб.
Диггәт: Хәбәрдән истифадә етдикдә мәнбәјә истинад лазымдыр
