Әһли-Бејт (әлејһимус сәлам) – Бејнәлхалг Хәбәр Аҝентлији- АБНА: Реҝионларарасы "Әл-Гүдс Әл-Әрәби" гәзетинин мәлуматына ҝөрә, Русија гүввәләри Түркијәнин бөлҝәјә мүдахиләсиндән сонра 2019-ҹу илин сонларындан бәри күрдләрин чохлуг тәшкил етдији Һасеке әјаләтиндә јерләшән Гамышлы һава лиманындан һәрби база кими истифадә едирди.
Һасеке әјаләтиндәки Сурија һәрби рәсмиси билдириб: "Русија гүввәләри чәршәнбә ахшамы ағыр техникаларыны вә силаһларыны һава јолу илә Суријадакы ән ваҹиб Русија һава базасы һесаб едилән Латакија әјаләтиндәки Һмејмим базасына көчүрдүләр."
Русија бу аддымы Сурија ордусу илә күрд гүввәләри арасында артан һәрби ҝәрҝинликдән һәфтәләр сонра атыб. Бу ҝәрҝинликдән сонра күрд гүввәләри Дејр әз-Зор вә Ракка әјаләтләриндәки ҝениш әразиләрдән ҝери чәкиләрәк, Һасеке әјаләтиндәки күрдләрин чохлуг тәшкил етдији әразиләрә доғру һәрәкәт едиб вә орада јерләшибләр.
Күрд тәһлүкәсизлик гүввәләринин һава лиманы мүһафизәчиләриндән бири билдириб: “Бу, һава лиманыны тәрк едән сонунҹу Русија тәјјарәсидир.”
Гејд едәк ки, 2019-ҹу илин нојабр ајында, күрд гүввәләринә гаршы Түркијәнин ҝенишмигјаслы һүҹумундан вә онларын бөјүк бир сәрһәд золағындан ҝери чәкилмәсиндән сонра, Русија мүвафиг разылашманын иҹрасыны изләмәк үчүн Гамышлы һава лиманыны һәрби базаја чевирмишди.
Күрдләр о дөврдә өзләрини АБШ тәрәфиндән тәрк едилмиш һисс етдиләр вә әразиләрини потенсиал Түркијә һүҹумларындан горумаг үчүн Дәмәшгә вә онун дәстәкчиси Москваја мүраҹиәт етдиләр.
О вахтдан бәри Русија гүввәләри күрдләрин әлиндә олан әразиләрдә патрул хидмәти ҝөстәрәрәк, онларла Түркијә ордусу арасында буфер ролуну ојнајырлар.
Бәшәр Әсәд режиминин деврилмәсиндән бир нечә һәфтә сонра Русија Дәмәшгә рәсмиләр ҝөндәрди вә өзүнү Сурија президенти елан едән Әһмәд әл-Шараа өтән илин октјабр ајында Москваја сәфәр етди вә Русија президенти тәрәфиндән сәмими гаршыланды.
Русија һазырда јени Сурија һакимијјәти илә әлагәләринин бир һиссәси олараг ики әсас базасынын - Тартус дәниз базасынын вә өлкәнин кечмиш Совет Иттифагы хариҹиндәки јеҝанә һәрби базалары олан Һмејмим һава базасынын ҝәләҹәјини тәмин етмәјә чалышыр.
Sizin rəyiniz