Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Иран Ислам Республикасынын Рамсар шәһәриндә 5 апрел тарихиндә кечирилән Азәрбајҹан-Түркијә-Иран хариҹи ишләр назирләринин үчтәрәфли ҝөрүшү чәрчивәсиндә Иран Ислам Республикасынын хариҹи ишләр назири Мәһәммәд Ҹавад Зәриф һәмкары Азәрбајҹан Республикасынын хариҹи ишләр назири Елмар Мәммәдјарову гәбул едиб.
Ҹәбһәдә јаранан сон вәзијјәтлә әлагәдар әтрафлы мәлумат верән назир Елмар Мәммәдјаров билдирди ки, Ермәнистан Силаһлы Гүввәләри 2 апрел 2016-ҹы ил тарихиндә ҹәбһәјаны әразиләрдә сых мәскунлашан мүлки әһалини һәдәфә алараг, Азәрбајҹан гошунларынын тәмас хәтти бојунҹа мөвгеләрини ағыр силаһлардан интенсив атәшә тутуб.
Назир әлавә етди ки, һәмин ҝүн саат 15:00-дан етибарән атәшкәсин башланмасы барәдә разылыг олса да, Ермәнистан тәрәфи буна риајәт етмәјиб, ејни заманда 3 апрел тарихиндә Азәрбајҹан тәрәфи хошнијјәт вә сүлһпәрвәр мәрамлардан чыхыш едәрәк, әкс-һәмлә вә ҹаваб тәдбирләрини биртәрәфли гајдада дајандырмасы барәдә гәрар версә дә, Ермәнистан артиллерија вә диҝәр ағыр силаһларла Азәрбајҹан ордусунун мөвгеләрини интенсив олараг атәшә тутмагда давам едиб. Назир билдирди ки, Ермәнистан бејнәлхалг иҹтимаијјәти алдадыр, бүтүн васитәләрлә, о ҹүмләдән ҝәрҝинлијин јарадылмасы вә сахланылмасы илә мүнагишәнин һәллинин әсасыны тәшкил едән мәсәләләрдән диггәти јајындырмаға вә статус-квону сахламаға чалышыр. О, гејд етди ки, бејнәлхалг иҹтимаијјәт Ермәнистана ҹидди тәзјиг ҝөстәрмәли вә Ермәнистанын тәхрибатлары дајандырмасына вә Азәрбајҹан әразиләриндән гошунларыны чыхармасына наил олунмалыдыр. Азәрбајҹан атәшкәсин тәмин едилмәси вә мүнагишәнин һәлли истигамәтиндә ҹидди сијаси просесин башламасынын тәрәфдарыдыр.
Иран Ислам Республикасынын хариҹи ишләр назири Мәһәммәд Ҹавад Зәриф јаранмыш вәзијјәтдән нараһат олдугларыны билдирди. О, әлавә етди ки, Иран Ислам Республикасынын Азәрбајҹанла чох јахшы әлагәләри мөвҹуддур.
Мәһәммәд Ҹавад Зәриф Ермәнистан тәрәфиндән атылан мәрмиләрдән биринин ИИР әразисинә дүшдүјү вә бунунла бағлы ИИР-ын Мүдафиә назиринин һәр ики өлкәнин мүдафиә назирләри илә данышыглар апардығы барәдә мәлумат верди. ИИР атәшкәсин тезликлә бәрпа олунмасы вә мүнагишәнин ән гыса мүддәт әрзиндә һәллинә тәрәфдар олдуғуну вурғулады.
Диггәт: Хәбәрдән истифадә етдикдә мәнбәјә истинад лазымдыр
