Азәрбајҹан Республикасынын һазырда 2 илә јахындыр Русијанын нәзарәтиндә галан әразисиндә 32-ҹи илдир ки, фәалијјәт ҝөстәрән режимин “дөвләт назири” Артак Бегларјан дүнән – нојабрын 3-дә сонунҹу мәтбуат конфрансыны кечириб. О, бу вәзифәни ики ај әввәл ҝуја Русија вәтәндашлығындан имтина едәрәк Гарабаға көчән милајрдер иш адамы Рубен Варданјана һәвалә едир. Бу һагда АБШ-ын “Азадлыг” радиосунун ермәни бүросу хәбәр верир.
Гарабағдакы “һаким партија”нын “депутат” олан үзвү Арам Арутјунјан русијалыја ҝениш сәлаһијјәтләрин верилдијини дејиб: “Әҝәр Артак Бегларјан тәһсил, сосиал саһә, сәһијјә вә әдлијјә саһәләринә нәзарәт едирдисә, Рубен Варданјанын нәзарәтиндә хариҹи әлагәләр, шәһәрсалма, малијјә, кәнд тәсәррүфаты вә әрази идарәчилији саһәләри дә олаҹаг. Демәк олар ки, һәрби саһә вә електрик енержиси сәнајеси истисна олмагла бүтүн саһәләр Рубен Варданјанын нәзарәтиндә олаҹаг”, - Арутунјан билдириб.
Русијадан Гарабаға көчүрүлән Рубен Варданјан кадр дәјишиклији сәлаһијјәтини дә алаҹаг. А. Арутјунјанын сөзләринә ҝөрә, о, тәјинатлары тәкбашына һәјата кечирә биләҹәк.
Хатырладаг ки, өнҹәдән јајылмыш мәлуматлара ҝөрә, "Путинин милјардер десанты" адланан, “Тројка Диалог” инвестисија ширкәтинин кечмиш саһиби 53 јашлы олигарх милјардер Рубен Варданјан нојабрын 4-дән, јәни бу ҝүндән Ханкәндиндәки сепаратчы режимин гондарма "дөвләт назири" вәзифәсинин иҹрасына башлајыр.
342/
