Мәсулијјәтдән јајынма вә диндарлара гаршы һәгигәтдән узаг иттиһам

АБНА24 Хәбәр Верир ,Азәрбајҹан Республикасынын президенти апрелин 29-да АДА Университетиндә “Ҹәнуби Гафгаз: Инкишаф вә әмәкдашлыг” мөвзусунда бејнәлхалг конфрансда чыхышы заманы дејиб: "Һәр ики өлкәнин әрази бүтөвлүјү илә бағлы бизим һөкумәтимизин вә Иран һөкумәтинин мөвгеји јахшы мәлумдур вә суал доғурмур. Дәфәләрлә биз вә бизим иранлы һәмкарларымыз буну иҹтимаи шәкилдә бәјан етмишик.

Бунунла белә дөвләт башчысы Шуша Гурултајында бәзи анти-Иран үнсүрләрин гоншу өлкәјә гаршы тәхрибатчы чхышларыны, онун әрази бүтөвлүјүнү шүбһә алтына алмаларыны әсасландырмаға чалышыб. “Һәмин тәдбирдә 400-дән чох иштиракчы олуб вә демократик ҹәмијјәт олан Азәрбајҹанда инсанлар фикирләрини ифадә етмәкдә сәрбәстдирләр. Биз бунунла разылаша вә ја разылашмаја биләрик, анҹаг биз иштиракчылара нәзарәт етмәмишик. Биз онлара тезисләр вермәмишик ки, нәји демәк олар, нәји исә јох. Азәрбајҹан азад өлкәдир вә һәр кәс – бизим вәтәндашлар вә әҹнәби вәтәндашлар истәдијини сөјләјә биләр, - дејә Илһам Әлијев ики өлкә әлагәләринә көлҝә салан чыхышлара ҝөрә мәсулијјәт дашымадығыны вә Азәрбајҹана һеч бир аидијјәти олмадығыны сөјләјиб.

Онун сөзләринә ҝөрә, Азәрбајҹан тәрәфиндән тәшкил едилмиш тәдбирдә һәр һансы шәхсин иштиракы белә бир реаксијаја сәбәб олмамалыдыр.

Гејд едәк ки, Шуша конфрансында Иранын мәһкәмә органлары тәрәфиндән ахтарышда олан гараҝуруһчу үнсүрләрин Ислам Республикасына гаршы налајиг ифадәләр ишләтмәси нәинки һөкумәтин сусгунлуғу илә мүшајиәт олунду, һәтта онларын сепаратизми тәблиғ етмәси үчүн медиаларда чыхышларына ҝениш имканлар јарадылды. Онлардан бири Азәрбајҹан Республикасынын “Хурал ТВ” каналына мүсаһибәсиндә иддиа едиб ки, ҝуја Иран Азәрбајҹанында “мүстәгиллик” уғрунда ҹидди мүһарибә ҝедир, ҝуја Иран Азәрбајҹан Республикасыны ачыг шәкилдә һәдәләјир, ҝуја Иран икинҹи Гарабағ мүһарибәсинә ҝетмәк үчүн Азәрбајҹан Республикасынын сәфирлијиндә гејдијјатдан кечән азәриләри һәбс едиб!

Һәмин бу сепаратчы өз фикирләринин давамында дејиб: “Теһран режими Азәрбајҹан һөкумәтинин варлығындан горхур... гачагмалчыларын вә террорчуларын Азәрбајҹан Республикасы сәрһәдиндән кечмәсинә мане олмур...Теһран режиминин бүтүн дүнјада бирҹә досту јохдур. Иран дағылыр... Инди Иран адланан јердә вәзијјәт Совет Иттифагынын дағылмасындан да писдир...”.

Азәрбајҹанла гоншу өлкәнин әлејһинә белә тәһгирамиз вә тәфригәчи ачыгламанын верилмәсинин Теһран-Бакы әлагәләринә нә дәрәҹәдә зијан вура биләҹәјини нәзәрә алараг, мүвафиг дөвләт гурумларынын сусгунлуг нүмајиш етдирмәси вә ја онларын тәхтибатчы әмәлләринә шәраит јаратмасы ҹидди суаллар доғурур. Шүбһәсиз ки, бу ҹинајәт һалынын сөз вә ифадә азадлығы илә изаһ едилмәси мүмкүн дејил вә һакимијјәт өз мәсулијјәтиндән јајына билмәз.

Әлбәттә “Ҹәнуби Гафгаз: Инкишаф вә әмәкдашлыг” мөвзусунда бејнәлхалг конфрансда бу һәгигәти пәрдәләмәк үчүн Илһам Әлијев иранлы експертин Шуша конфрансындакы чыхышларла бағлы ирадына мәнтигли ҹаваб вермәк јеринә Иранда ҝуја Азәрбајҹан Республикасынын әрази бүтөвлүјүнү шүбһә алтына алан бир сыра Азәрбајҹан вәтәндашынын мөвҹуд олдуғуну иддиа едиб.

“Иранда сығынаҹаг тапмыш бир сыра шәхсләр вар ки, онлар Азәрбајҹанын әрази бүтөвлүјүнү мүнтәзәм гајдада шүбһә алтына алыр. Актау шәһәриндә Хәзәрјаны дөвләтләрин Зирвә топлантысы чәрчивәсиндә мәним овахткы президент Һәсән Руһани илә ҝөрүшүмдә она 20-јә јахын азәрбајҹанлыдан ибарәт сијаһы тәгдим етдим ки, һәмин шәхсләр Иранда јашајыр вә мүтәмади шәкилдә медиа вә сосиал шәбәкәләр васитәсилә тәкҹә Азәрбајҹанын әрази бүтөвлүјүнү шүбһә алтына алмыр, онлар елә ифадәләр ишләдирләр ки, бу, нормал ҹәмијјәтдә әдәбсизликдир. Биз һәмин шәхсләрин Азәрбајҹана тәһвил верилмәсини тәләб етдик, чүнки һәмин шәхсләр Ҝәнҹә шәһәриндә полисә һүҹумда иштирак етмишләр вә биздә сүбутлар вар. Тәәссүфләр олсун ки, онларын һеч бири тәһвил верилмәди”, дејә Илһам Әлијев гејд едиб.

Мараглыдыр ки, дөвләт башчысынын ишарә етдији диндарлар һәр заман Азәрбајҹан Республикасынын әрази бүтөвлүјүнү мүдафиә етмиш вә Гарабағ уғрунда ҝедән савашда фәал иштирак етмишләр. Мәһз белә шәхсләрин ҹанфәшанлығы, дөвләтин һагг ишини дәстәкләмәси вә шәһадәт фәлсәфәсини дөјүшчүләрә ашыламасы, һәтта бу мүгәддәс јолда ҹанларындан кечмәләри торпагларын ишғалдан азад едилмәсинә өз төһфәсини верди вә инди онларын мәсләкдашларына гаршы хошаҝәлмәз иттиһамын ирәли сүрүлмәси һеч бир вәҹһлә инандырыҹы дејилдир.

342/