АБНА24 Хәбәр Верир, һәрби експерт, полковник Үзејир Ҹәфәров дејиб ки, әслинә галса, бу мәсәлә өлкәмизин әразисинә мүвәггәти јерләшдирилмиш рус сүлһмәрамлыларынын бөлҝәдән дәрһал узаглашдырылмасыны ҝүндәмә ҝәтирир. Ән азы Русија сәфири Хариҹи Ишләр Назирлијинә чағырылмалыдыр. Чүнки баш верән һадисә гәбуледилмәздир вә Азәрбајҹан ганунларына һөрмәтсизликдир.
Гејд едәк ки, Кәлбәҹәрә ҝедән Азәрбајҹан машын карванына рус сүлһмәрамлылары илә бәрабәр сепаратчылар да бахыш кечириб.
Експертә ҝөрә, рус сүлһмәрамлылары бир ил үч ајдыр ки, јерләшдирилдикләри әразиләрдә өз вәзифәләрини јеринә јетирмирләр: “Биз индијәдәк кифајәт гәдәр сәбир нүмајиш етдирдик. 2020-ҹи илдә рус сүлһмәрамлылары өлкәмизин әразисинә дахил олдугдан сонра онлардан өз вәзифәләрини јеринә јетирәҹәкләрини дүшүнүрдүк. Амма тәәссүфләр олсун ки, онлар он беш ајдыр орада һеч нә етмирләр. Әксинә Кәлбәҹәрдәки мәнзәрә бизә ону демәјә әсас верир ки, рус сүлһмәрамлылары һәмин әразидә сепаратизмин ҝенишләнмәсинә вә чичәкләнмәсинә максимум шәраит јарадыблар. Рус сүлһмәрамлылары о һәјасызлары јанларына салыб, бизим машынлары јохлајырлар”, - дејә Үзејир Ҹәфәров вурғулајыб.
Һәрби експерт даһа сонра бүтөвлүкдә Русијанын Гарабағ сијасәтиндән шикајәтләниб.
Ҹәфәров дејиб: “Азәрбајҹан Президенти “Ханкәнди” дејир, Русија Мүдафиә Назирлији өз рәсми интернет сәһифәсиндә “Степанакерт” јазыр, биз “Хоҹавәнд” дејирик, онлар “Мартуни” јазыр, биз “Гарабағ”дан данышырыг, онлар исә һәлә дә “Дағлыг Гарабағ”дан бәһс едирләр. Бунлар јолверилмәздир. Санки белә шејләри бизим ҝөзүмүздә адиләшдирәрәк биздән бунунла барышмағымызы истәјирләр. Садә шәкилдә десәк, бу һадисә бизи тәһгир етмәкдир, халгымызын һејсијјатына тохунмагдыр вә бизә гаршы чағырышдыр, бизә әлҹәк атмагдыр”.
342/
3 fevral 2022 - 19:45
Xəbər kodu: 1225708
Азәрбајҹан машын карванына рус сүлһмәрамлылары илә бәрабәр ермәни сепаратчыларынын да бахыш кечирмәси өлкәдә гәзәблә гаршыланыб
