АБНА24 Хәбәр Верир, Ермәнистанын һаким “Вәтәндаш мүгавиләси” партијасы өлкә президентлији вәзифәсинә јүксәк технолоҝијалар сәнајеси назири Ваагн Хачатурјанын намизәдлијини ирәли сүрмәји планлашдырыр. Бу барәдә Спутник Армениа мәлумат јајыб.
Гејд едәк ки, өтән базар ҝүнү, јанварын 23-дә Ермәнистан президенти Армен Саркисјан истефа вердијини бәјан едиб вә билдириб ки, президент өлкә вә милләт үчүн һазыркы чәтин дурумда дахили вә хариҹи сијасәтә тәсир етмәк үчүн лазыми аләтләрә малик дејил.
О гејд едиб ки, онун бу гәрары емосионаллыгдан дејил, мүәјјән мәнтигдән ирәли ҝәлир.
А.Саркисјанын сөзләринә ҝөрә, Ермәнистанда парадоксал вәзијјәт јараныб: “Президент фактики олараг һеч бир реал аләтә малик олмадан дөвләтчилијин тәминатчысы олмаға мәҹбурдур. Ермәнистан формаҹа парламентли республикадыр, мәзмунҹа исә белә дејил”.
О, конститусија ислаһатларынын апарылмасыны да тәклиф едиб. Билдириб ки, бу һалда гаршылыглы нәзарәт вә таразлыг механизмләринә әсасланан дөвләт системи јарадылаҹаг.
Саркисјан һәмчинин дејиб ки, һазырда Ермәнистан президентин сүлһ вә мүһарибә мәсәләләринә гарыша билмәјәҹәји, демократија үчүн әлверишсиз һесаб етдији ганунлара вето гоја билмәјәҹәји реаллыгда јашајыр.
Гејд едәк ки, јени дөвләт башчысы вәзифәсинин иҹрасына башлајана гәдәр онун сәлаһијјәтләрини парламентин сәдри иҹра едәҹәк. Јени президенти дә ганунвериҹи орган сечәҹәк. Депутатларын үмуми сајынын азы дөрддә бири президентлијә намизәд ирәли сүрмәк һүгугуна маликдир.
342/
31 yanvar 2022 - 19:51
Xəbər kodu: 1224685
Ермәнистанын һаким партијасынын президентлијә намизәдинин ады мәлум олду.
