АБНА24 Хәбәр Верир, артыг бир нечә ҝүндүр ки, узун илләр әрзиндә сабитлик вә тәһлүкәсизлик шәраитиндә инкишафыны мүшаһидә етдијимиз Газахыстанда сакитлик позулуб. Јени илин илк ҝүнләриндә маје газ јанаҹағынын гијмәтинин артмасы һаггында елан бир нечә бөлҝәдә вәтәндашларын етираз нүмајишләринә сәбәб олду. Дөвләт башчысы Токајевин енержи ширкәтләри тәрәфиндән даһа өнҹә елан олунмуш гијмәт артымына дәрһал “вето” гојмасына вә һөкумәти истефаја ҝөндәрмәсинә бахмајараг нүмајишләр дајанмаг әвәзинә даһа да ҝүҹләнди. Гыса бир мүддәтдә јанаҹағын гијмәти илә башланан динҹ нүмајиш Газахыстан дөвләтини вә дөвләтчилијини тәһдид едән террор һүҹумуна чеврилди. Президент Токајев хариҹи тәсир амилләрини әсас ҝәтирәрәк КТМТ-дән сүлһмәрамлы гүввәләрин дәстәјини хаһиш етди вә дәрһал белә бир дәстәк ҝөстәрилди.
Бу арада КТМТ-нин Газахыстана һәрби дәстәләр ҝөндәрмәсинә Гәрб тәрәфиндән сәрт реаксија верилиб. АБШ дөвләт катиби Ентони Блинкен бәјан едиб ки, Газахыстан һакимијјәти Коллектив Тәһлүкәсизлик Мүгавиләси Тәшкилатынын иштиракы олмадан тәкбашына иғтишашлара гаршы мүбаризә апармаға гадирдир. Газахыстан лидерләринин һансы сәбәбдән кәнар јардыма еһтијаҹ дујдуглары ајдын дејил.
Хатырладаг ки, Газахыстан тез-тез авторитар адландырылан сабит Мәркәзи Асија дөвләтидир. 2019-ҹу илә гәдәр бу өлкәјә шәхсијјәтә пәрәстиш үнсүрләри илә сечилән президент Нурсултан Назарбајев рәһбәрлик едиб, онун һејкәлләри өлкә боју уҹалдылыб вә пајтахтын ады онун шәрәфинә дәјишдирилиб.
Инди иғтишашлардан сонра өлкәдә ҝениш мигјаслы ислаһатын һәјата кечирилмәси тәвәгге едилир. Һәләлик буна бир сыра коррупсионер мәмурларын вәзифәдән азад едилмәси вә ја һәбсә алынмасы илә старт верилиб. Лакин бир шеј мәлумдур ки, Русија индики режимин һакимијјәтдә галмасында исрарлыдыр вә халгын әксәр тәләбләринин јеринә јетирилмәси ҝөзләнилмир. Үстәлик белә тәсәввүр дә јараныб ки, Русијанын Газахыстана тәсири даһа да ҝүҹләнәҹәк. Буну Азәрбајҹанда бәзи аналитикләр арасында һәтта Газахыстанын Русија тәрәфиндән ишғалы кими гијмәтләндирәнләр дә вар. Онлар Русија президентини ССРИ-ни бәрпа етмәјә ҹәһд ҝөстәрмәкдә иттиһам едәрәк, Газахыстан ссенарисинин диҝәр республикаларда да тәкрарлана биләҹәјини вурғулајырлар.
342/
9 yanvar 2022 - 13:53
Xəbər kodu: 1217150
Газахыстанда халг үсјаны јени илин ән мүһүм һадисәси олараг бу ҝүнләр диггәтләри чәкди, хүсусән дә рус гошунларынын бу Мәркәзи Асија өлкәсинә ҝөндәрилмәси Русија илә Гәрб арасында зиддијјәт доғуран јени мәсәләјә чеврилди.
