АБНА24 Хәбәр Верир, Русија хариҹи ишләр назиринин мүавини Андреј Руденко ТАСС аҝентлијинә мүсаһибәсиндә Ҹәнуби Гафгазда нәглијјат коммуникасијаларынын бәрпасы үзрә ишләр һагда данышыб.
“Ҹәнуби Гафгазда бүтүн игтисади вә нәглијјат әлагәләринин бәрпасы Азәрбајҹанла Ермәнистан арасында мүнасибәтләрин нормаллашмасы үзрә ишләрин ән башлыҹа истигамәтләриндән биридир. Русија бу просесин билаваситә иштиракчысыдыр”, - дејә назир мүавини билдириб.
Руденко хатырладыб ки, 2021-ҹи илин јанварында Москвада кечирилән үчтәрәфли ҝөрүшдә Азәрбајҹан, Ермәнистан вә Русија баш назирләринин мүавинләринин һәмсәдрлији алтында ишчи груп јарадылыб. Бу механизм чәрчивәсиндә реҝионда һәм дәмир јол, һәм автомобил јолунун ачылмасы үчүн мүһүм һазырлыг ишләри ҝөрүлүб. Һазырда ваһид “пакет” үзәриндә ишләр ҝедир. Белә јанашма гәбул едилән гәрарларын дајаныглығыны тәмин едәҹәк.
Хатырладаг ки, өтән ил нојабрын 26-да Азәрбајҹан, Ермәнистан вә Русија рәһбәрләринин Сочидә баш тутмуш үчтәрәфли ҝөрүшүндә Зәнҝәзур дәһлизинин дәмир јол һиссәсинин ачылмасына даир практики разылашма әлдә едилмишди. Ермәнистан артыг бу дәмир јолунун өз әразисиндән кечән һиссәсинин бәрпасы үчүн һазырлыг ишләринә башлајыб, Азәрбајҹанда исә Һорадиз-Ағбәнд дәмир јолунун бәрпасы ишләри һәлә һәрби әмәлијјатларын баша чатмасындан гыса заман сонра башламышды. Вә һазырда бу истигамәтдә ишләр сүрәтлә давам етдирилир.
Нахчывана Азәрбајҹандан автомобил јолунун ачылмасы мәсәләсиндә исә һәләлик гејри-мүәјјәнлик галыр. Ән башлыҹасы, бу јолун маршруту мәлум дејил. Ермәнистан тәрәфи бир нечә ај әввәл билдирмишди ки, Нахчывана гуру јолунун Лачын-Ҝорус маршрутуну тәклиф едир. Һансы ки, бу јолла Нахчыванын Шаһбуз рајонуна чыхмаг мүмкүндүр.
Бу арада Русија хариҹи ишләр назиринин мүавини “ваһид пакет” барәдә данышырса, бу пакетә чох ҝүман ки, Нахчывана дәмир јолунун ачылмасы илә ејни вахтда Азәрбајҹан үзәриндән Ермәнистана дәмир јол әлагәсинин дә бәрпасы дахилдир. Бу дәмир јолу исә һәм дә Русијанын Ермәнистанла бирбаша гуру әлагәсини тәмин едәҹәк.
Хатырладаг ки, Азәрбајҹан президенти Илһам Әлијев Зәнҝәзур дәһлизиндә дә Лачын дәһлизиндә олдуғу сәрбәст ҝедиш-ҝәлиш режиминин мөвҹуд олмасы шәртини ирәли сүрүб.
Мүшаһидәчиләр јахын ајларда артыг нәглијјат коммуникасијаларынын ачылмасына даир илк разылашманын имзаланаҹағыны тәхмин едирләр.
342/
3 yanvar 2022 - 16:28
Xəbər kodu: 1215170
Зәнҝәзур дәһлизи ачылаҹагмы? Русија хариҹи ишләр назиринин мүавини “ваһид пакет”дән данышды.
