АБНА24 Хәбәр Верир, октјабрын 26-да Иранын Азәрбајҹандакы сәфири Сејид Аббас Мусәви Азәрбајҹан Мәтбуат Шурасында (МШ) олуб. МШ сәдри Әфлатун Амашов Азәрбајҹан-Иран мүнасибәтләринин һазыркы дурумундан соз ачыб. О билдириб ки, бүтүн саһәләрдә өлкәләр арасындакы јүксәк сәвијјәли әлагәләр Азәрбајҹанын вә Иранын медиа органларынын фәалијјәтинә дә мүсбәт тәсирини ҝөстәриб. МШ сәдри һәмчинин Азәрбајҹан Ордусунун Гарабағ ҹәбһәсиндә әлдә етдији уғурлар барәдә сөз ачыб вә гејд едиб ки, бу уғурлар Азәрбајҹан-Иран сәрһәд бүтөвлүјүнү тәмин едиб. Бу исә сон дәрәҹә ваҹиб сијаси мәгамдыр. “Азәрбајҹан өз торпагларыны ишғалдан хилас едир. Өлкәмизин иши һагг ишидир. Әминик ки, Азәрбајҹанын ҹәнуб гоншусу олан дост Иран дөвләти дә бу мүбаризәмиздә бизә мәнәви дәстәкдир. Буну һисс етмәк чох хошдур”, – Ә.Амашов вурғулајыб. Сәфир Сејид Аббас Мусәви билдириб ки, Иран Азәрбајҹанын әрази бүтөвлүјүнү таныјыр, Дағлыг Гарабағ мүнагишәсинин әдаләтли һәллиндә мараглыдыр. Ислам Республикасы ејни заманда Гарабағы да ишғал олунмуш әрази кими танымагдадыр. Сәфир Иранын мүһарибә башлајандан Ермәнистанла һава вә гуру јолуну бағладығыны билдириб. Һәтта стратежи әһәмијјәтә малик гида мәһсулларынын Ермәнистана дашынмасынын да дајандырылдығыны диггәтә чатдырыб. Дағлыг Гарабағда фәалијјәт ҝөстәрән Иран ширкәтләри илә бағлы јајылан мәлуматларла әлагәдар мәсәләјә ҝәлинҹә, Мусәви билдириб ки, Иран әразисиндә гејдијјатдан кечмиш һеч бир һүгуги шәхсин ишғал олунмуш әразиләрдә ишләмәк һаггы јохдур. Әҝәр бу сајаг һаллар варса, бунлар Ирандан кәнарда јарадылмыш вә гејдијјатдан кечмиш гурумлардыр. "Биз чох шадыг ки, Азәрбајҹанын Иранла сәрһәд рајонлары ишғалдан азад олунуб", – дејән сәфир Мусәви ордунун зәфәрләри илә бағлы Азәрбајҹан халгыны тәбрик едиб, шәһид олмуш Азәрбајҹан һәрбчиләринин аиләләринә башсағлығы вериб. Сәфир Сејид Аббас Мусәви һәмчинин билдириб ки, рәһбәрлик етдији дипломатик миссија һәр заман ики өлкәнин медиа гурумлары арасындакы мүнасибәтләрин дәринләшмәсинә чалышыб вә бундан сонра да тәшәббүсләрини давам етдирәҹәк.
342/
