АБНА24 Хәбәр Верир, бу сөзләри медиаја Нефт Арашдырмалары Мәркәзинин рәһбәри, игтисадчы-експерт Илһам Шабан “Шимал ахыны-2” газ бору кәмәринин тикинтисинин АБШ-ын тәтбиг етдији санксијалара ҝөрә ләғв едилә биләҹәји һагда сәсләнән иддиалары шәрһ едәркән дејиб. Експерт билдириб ки, АБШ-ын Русијаја тәтбиг етдији игтисади санксијалар јалныз “Шимал ахыны-2” газ бору кәмәринин тикинтисини ләнҝитмәк мәгсәди дашымыр: “Мөвҹуд игтисади санксијалар Русијанын 2014-ҹү илдә Крымы илһаг етмәсинә ҹаваб олараг тәтбиг едилиб. АБШ-ын бу ҝүн Русијаја игтисади санксијалар тәтбиг етмәсини фәргли шәрһ едәнләр дә вар. АБШ санксијалар јолу илә Русијанын сатыш базарына мүдахилә едәрәк, өз тәбии газыны Авропаја сатмаг истәјир. Бу ҝүн Авропанын рус газындан ҹидди асылылығы мөвҹудур. АБШ бу асылылығы азалтмағы һәдәфләјир”. Експерт дејиб ки, “Шимал ахыны-2” газ бору кәмәринин тикинтисинин дајандырылмасы Авропа газ базарында бошлуг јаратмаз: “Русија бу лајиһәни тәртиб едәндә әсас мәсәлә Украјна вә Беларусун әразисиндән јан кечмәк иди. Јәни диҝәр бору кәмәрләринин бир чоху бирбаша вә ја долајы јолла бу өлкәләрдән кечәрәк Авропаја чатырды. Бу исә өз нөвбәсиндә Русијанын Беларус вә Украјнаја ихраҹ етдији газы бөлүшмәси вә ја уҹуз сатмасы демәк иди. Јәни “Шимал ахыны-2” газ бору кәмәринин Русија үчүн әсас өнәми бу өлкәләрдән јан кечмәси иди. “Шимал ахыны-2”-нин тикинтиси дајандырылса, бу, Русија үчүн баһа баша ҝәләҹәк. Чүнки Русија бу лајиһәјә хәрҹ чәкиб. Бору кәмәринин тәкҹә Балтик дәнизи һөвзәсиндән кечән һиссәси үчүн Русија 160 милјон доллар хәрҹләјиб. Бундан әлавә, Русијанын бу лајиһәдән әлдә едәҹәји ҝәлир иллик 10 милјард авро һәҹминдәдир. Бүтүн бунлары ҝөз өнүндә тутанда вәзијјәтин ҹиддилијини анламаг олур”.
342/
