Әһли Бејт (әлејһимус-сәлам) - АБНА – Хәбәр Аҝентлији: Фүрсәтләри әлдән вердикдән сонра Уҹа Аллаһдан неҹә мөһләт истәјә биләрик? Бу барәдә Гурани-Кәримдә бујурулур: “Еј Рәббимиз, јахын бир мүддәтәдәк бизи(м әзабымызы) тәхирә сал ки, Сәнин дәвәтини гәбул едәк вә пејғәмбәрләринә табе олаг”. (“Ибраһим” 44).
Бу ајәјә нәзәр салан заман ҝөрүрүк ки, бизә илк олараг Гијамәт ҝүнүнү хатырладыр. Анҹаг ајәјә диггәтлә баханда ҝөрмәк олур ки, дүнјада олан Илаһи әзабдан данышыр. Чүнки әзабы тәхирә салмаг, Аллаһын дәвәтини гәбул етмәк вә пејғәмбәрләрин (ә) ардыҹылы олмаг – дүнјаја аид олан мөвзудур, Гијамәтә дејил.
Гијамәт ҝүнү даһа чох бәндәләрин дүнјаја ҝери гајытмаг хаһиши диггәтимизи ҹәлб едир. “Белә исә (бурадан) чыхмаг үчүн бир јол вармы?”. (“Ғафир” 11).
“Еј Рәббимиз! (вәд вердијин шеји өз ҝөзүмүзлә вә гулагларымызла) ҝөрдүк вә ешитдик, белә исә бизи ҝери гајтар ки, јахшы ишләр ҝөрәк”. (“Сәҹдә” 12).
“Онлар орада дад-фәрјад едәрләр: «Еј Рәббимиз, бизи (бурадан) чыхарт ки, (индијәдәк) етдикләримиздән фәргли олараг јахшы ишләр ҝөрәк»”. (“Фатир” 37).
Бу ајәләрдән белә нәтиҹәјә ҝәлмәк олур:
1. Ҝүнаһкарлар бу дүнјадан пешман һалда ҝедәрләр вә әлдән вердикләри фүрсәти ҝери гајтара билмәзләр.
2. Ниҹат јолу пејғәмбәрләрин (ә) ардыҹылы олмагдадыр.
Она ҝөрә дә һәр ким Аллаһдан мөһләт истәјәрсә, ҝәрәк Аллаһын дәвәтини гәбул едиб, онун елчиләринин ардыҹылларындан олсун. Анҹаг о заман дүнја вә ахирәтин бәлаларындан хилас ола биләр вә һәгиги ниҹата чатар.
Диггәт: Хәбәрдән истифадә етдикдә мәнбәјә истинад лазымдыр
