Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Иран Ислам Республикасынын Азәрбајҹандакы сәфирлији Ермәнистанын баш назири Никол Пашинјанын Теһранда јашајан бир груп ермәнинин “Арарат” клубунда кечирдији ҝөрүш барәдә ачыглама јајыб.
Сәфирликдән верилән ачыгламада дејилир:
“Иран Ислам Республикасынын Азәрбајҹан Республикасындакы сәфирлији бәјан едир ки, Иран Ислам Республикасынын дөвләт рәсмиләри Ермәнистанын баш назири илә Теһранда јашајан бир груп ермәнинин “Арарат” клубунда баш тутмуш өзәл ҝөрүшүнә һеч бир мүдахилә етмәјиб, бу ҝөрүшдә асылмыш плакат вә сәсләндирилмиш шүарлары, Иран ХИН-ин һөрмәтли сөзчүсүнүн дә дедији кими, өзбашына атылмыш вә гәбуледилмәз бир аддым кими гијмәтләндирир вә буну писләјир.
Вурғуламаг истәрдик ки, Иран Ислам Республикасы Азәрбајҹан Республикасынын мүстәгиллик газандығы илк вә чәтин ҝүнләриндә һәмишә Азәрбајҹан дөвләти вә милләтинин јанында олуб, Азәрбајҹан Республикасынын әрази бүтөвлүјүнү дәстәкләјиб вә бу сијасәтини дәјишмәјәҹәк. Һәмчинин дүшүнүрүк ки, Гарабағ мүнагишәси Азәрбајҹан Республикасынын әрази бүтөвлүјүнә һөрмәт принсипи әсасында вә сүлһ данышыглары јолу илә ики тәрәф арасында һәллини тапаҹагдыр.
Иран Ислам Республикасынын Азәрбајҹан Республикасы илә достлуғу вә гардашлығы әбәдидир вә һеч бир тәхрибат ики халгын ирадәсинә хәләл јетирә билмәз”.
Хатырладаг ки, бир нечә ҝүн өнҹә Иранда рәсми сәфәрдә олмуш Ермәнистан баш назири Никол Пашинјан Теһранын “Арарат” клубунда ермәни иҹмасы илә ҝөрүшүб вә орада ермәниҹә “Гарабағ Ермәнистандыр вә Сон” сөзләри јазылмыш плакат галдырылыб. Пашинјаны бу һадисәдән селфи чәкәрәк сосиал шәбәкәләрдә пајлашыб.
Диггәт: Хәбәрдән истифадә етдикдә мәнбәјә истинад лазымдыр
