Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Бакы Шәһәр Иҹра Һакимијјәти (БШИҺ) Гарабағ Комитәсинин (ГК) митинглә бағлы мүраҹиәтинә јенә мүсбәт ҹаваб вермәјиб.
Буну Гарабағ Азадлыг Тәшкилатынын (ГАТ) сәдри, аксијанын тәшкилатчыларындан Акиф Нағы билдириб.
«Јазылы ҹавабда аксијаја иҹазә верилмәмәсини Бакы Шәһәр Иҹра Һакимијјәти «президентин Гарабағ проблеми илә мәшғул олмасы вә индики һалда аксијаја еһтијаҹ олмамасы» илә изаһ едир», - А.Нағы гејд едиб.
О дејиб ки, февралын 13-дә Гарабағ Комитәси Али Мәҹлисинин топлантысынын кечирилмәси ҝөзләнир вә бу мәсәлә орада мүзакирә едилдикдән сонра митинглә бағлы ујғун гәрар гәбул олунаҹаг.
Тәшкилатчыларын сөзләринә ҝөрә, февралын 16-на планлашдырылан аксијада «Гарабаға азадлыг!», «Ишғала сон!» вә башга охшар шүарларын сәсләндириләҹәји нәзәрдә тутулурду.
Бу Комитәнин өтән илин сентјабрында Гарабағ мүнагишәсинин тәнзимләнмәсинин ҝүндәмдә сахланылмасы мәгсәдилә јарадылдығы ачыгланыб. Комитә өтән ил сентјабрын 29-да Бакыда «Гарабаға азадлыг!» шүары илә митинг кечириб.
Гурумун сонра нәзәрдә тутдуғу аксијалар исә шәһәр рәһбәрлији илә разылашдырылмадығындан тәхирә салыныб.
Диггәт: Хәбәрдән истифадә етдикдә мәнбәјә истинад лазымдыр
