Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, әзәләјорғунлуғу кими танынан миастенија хәстәлији әксәр һалларда 20-40 јашлар арасы инсанларда инкишаф едир. Гадынларда бу хәстәлијә даһа тез-тез тәсадүф едилир.
Миастенија сирли хәстәликдир. Бу вахта кими онун инкишаф етмә сәбәбләри вә механизми сона кими өјрәнилмәјиб. Бир чох һалларда хәстәлик ҝүҹлү стресс, сојугдәјмә хәстәлијиндән сонра инкишаф етмәјә башлајыр. Лакин бәзән хәстәлик һеч бир ҝөрүнән сәбәб олмадан инкишаф едә биләр.
Хәстәлик тәдриҹән инкишаф едир - инсан тез јорулур, зәифләјир, ҝөз гапаглары ашағы дүшүр, нитг ајдын олмур, инсан чејнәјәндә вә уданда әзијјәт чәкир.
Миастенија заманы инсан организминдә нә баш верир? Инсанын истәнилән һәрәкәти әзәләләрлә синирләрин коллектив ишидир - синирләр әзәләләрә импулслар өтүрүр, әзәләләр исә лазым олан һәрәкәтләр едир. Миастенија заманы бу просесдә позулмалар јараныр ки, нәтиҹәдә әзәләләр нормал ишләмир - тез јорулур, инсана "гулаг асмыр", һәтта ифлиҹ олур. Сәһәр ојанандан сонра хәстә өзүнү там нормал һисс едир, лакин бир нечә саатдан сонра хәстәлијин симптомлары мејдана чыхмаға башлајыр.
Беләликлә, хәстәлијин әсас симптому әзәлә зәифлијидир. Хәстәлик заманы истәнилән әзәлә зәдәләнә биләр. Даһа тез-тез үз вә бојун әзәләләри зәдәләнир. Хәстәлијин симптомлары арасында:
- патоложи јорғунлуг
- птоз (гөз гапагларынын енмәси)
- икилиҝөрмә
- нитгин позулмасы вә бурунда данышма
- удманын чәтинләшмәси вә чејнәмә әзәләләрин тез јорулмасы
- нәфәсалманын чәтинләшмәси (бу хүсусилә тәһлүкәлидир ки, инсанын боғулма нәтиҹәсиндә һәлак олмасына сәбәб ола биләр)
- бојун әзәләләрин тез јорулмасы (инсан башыны дүз тута билмир, әзијјәт чәкир)
- ајагларда вә голларда зәифлик.
Бир инсанда хәстәлијин бир нечә симптому ола биләр (мәсәлән, нитгин, чејнәмә вә удма просесләрин, нәфәсалманын позулмасы). Бу зәдәләнмиш әзәләләрдә асылыдыр. Миастенија заманы һәмчинин бәдәнин бүтүн әзәләләри зәдәләнә биләр.
Хәстәлијин симптомлары ҝәрҝинликдән сонра мејдана чыхыр. Ҝәрҝинлик артдыгда, хәстәнин вәзијјәти даһа да писләшир. Мисал үчүн, данышмаға башлајанда инсан бир аз буруна данышыр, лакин сөзләри ајдын тәләффүз едир. Даһа сонра ајры-ајры сәсләри "удмаға" башлајыр, сонра исә һеч даныша билмир. Бир мүддәт динҹәлдикдән сонра бу һал кечир.
Миастенијанын ағыр формаларында хәстәдә криз вәзијјәти инкишаф едә биләр ки, бу заман нәфәсалмада иштирак едән әзәләләр ифлиҹ ола биләр ки, бу да хәстәнин һәлак олмасына сәбәб олаҹаг.
Миастенија хроники прогрессивләшән хәстәликдир. Мүалиҹәсиз бурахылмыш бу хәстәлик ағыр позулмалара - әлиллијә вә һәтта инсанын өлүмүнә сәбәб ола биләр. Лакин миастенијаны там мүалиҹә етмәк мүмкүн олмаса да, мүәјјән мүалиҹә тәдбирләри бу хәстәлијин симптомлары илә уғурла мүбаризә апарыр. Белә хәстә даим һәкимләрин нәзарәтиндә олмалы вә мүалиҹә алмалыдыр. Бәзән ҹәрраһи мүалиҹә тәтбиг олунур. Миастенијанын мүалиҹәси илә невролог мәшғул олур.
Миастенија хәстәлији олан инсанлара ҝүнүн алтында гаралмаг, ағыр физики иш ҝөрмәк, бәзи дәрман препаратлары (магнезиум препаратлары, сидиговуҹулар, бәзи антибиотикләр вә с.) гәбул етмәк гәти сүрәтдә олмаз. Бу хәстәнин вәзијјәтинә мәнфи тәсир едәҹәк.
Диггәт: Хәбәрдән истифадә етдикдә мәнбәјә истинад лазымдыр
