Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Суријанын Дәмәшг шәһәриндә јерләшән Ханым Зејнәб (ә.с) зијарәтҝаһында Гәдир-Хум бајрамы гејд олунуб.
Дөвләт рәсмиләринин дә гатылдығы мәрасимдә шәһәр әһалиси вә Ханым Зејнәб (ә.с) һәрәминин мүдафиәчиләри иштирак едиб.
Тәдбирдә Ајәтуллаһ Хаменејинин Сурија үзрә нүмајәндәси Сејид Әбулфәз Тәбатәбаи Сурија вә Ираг халгыны сон ҝүнләр ИШИД үзәриндә әлдә едилән гәләбә мүнасибәти илә тәбрик едиб.
"Гәдир-Хум бајрамы һеч бир мәзһәбә аид дејил, бүтүн мүсәлманларын бајрамыдыр. Сон ҝүнләр Сурија ордусу вә мүгавимәт гүввәләр, еләҹә дә Ираг ордусу ИШИД террорчуларыны торпаглардан чыхартмаға, онлара ағыр зәрбәләр вурмаға наил олублар. Бу гәләбәләр мүнасибәти илә, еләҹә дә Гәдир-Хум бајрамы мүнасибәти илә Сурија халгыны, хүсусән мүгавимәт гүввәләрини вә Ханым Зејнәб һәрәминин мүдафиәчиләрини тәбрик едирәм” дејә вурғулајыб.
Гејд едәк ки, дәфәләрлә ИШИД террорчулары Ханым Зејнәб зијарәтҝаһыны дағытмаға чалышыблар. Бир нечә дәфә ракет зәрбәси илә һәдәфә алыблар. Зијарәтҝаһы партлатмаг үчүн террор акты планлашдырылыб. Орду гүввәләри тәрәфиндән террор актынын гаршысы алыныб. Һал-һазырда зијарәтҝаһ "Һәрәм мүдафиәчиләри” адланан көнүллүләр вә Сурија ордусу тәрәфиндән мүһафизә едилир.
Диггәт: Хәбәрдән истифадә етдикдә мәнбәјә истинад лазымдыр
