Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Бакы Ағыр Ҹинајәтләр Мәһкәмәсиндә Нардаран һадисәләриндән сонра ШӘРЛӘНӘРӘК һәбс олунан даһа 24 Шиәнин мүһакимәси давам едир. Онлар һәр бириндә 12 Шиә олмагла ики група бөлүнүб. Дүнја шөһрәтли Гуран Һафизи Һөҹҹәтүл Ислам Һаҹы Зүлфүгар Микајылов, Һөҹҹәтүл Ислам Һаҹы Сејјид Елман Ағајев, Һөҹҹәтүл Ислам Рамил Сејфуллајев, Һөҹҹәтүл Ислам Рузи Исмајылов, Исламчы активистләр Фаиг Аллаһвердијев, Меһман Гулијев, Меһман Мәммәдов, Елдар Бүнјадов, Елхан Һәсәнов, Мүбариз Ибраһимов, Әли Һүсејнов вә Ҹабир Әлијев) ишинә режимин әдаләтсиз һакими Зејнал Ағајевин сәдрлијилә бахылыр.
“Бизә ишҝәнҹә верәнләр ҹинајәт мәсулијјәтинә ҹәлб олунсун”
Апрелин 17-дә кечирилән мәһкәмәдә ШӘРЛӘНӘН руһаниләрдән Һөҹҹәтүл Ислам Рузи Исмајылов Ҝәнҹә шәһәр Баш Полис Идарәсинин Мүтәшәккил Ҹинајәткарлыгла Мүбаризә Шөбәсинин кечмиш рәиси, һазырда исә садәҹә, әмәлијјат мүвәккили олан Расим Гурбанов вә Огтај Оруҹовун барәсиндә ҹинајәт иши башланмасы үчүн Баш Прокурорлуға мүраҹиәт олунмасы һагда вәсатәт галдырыб.
ШӘРЛӘНӘН шәхсләрдән Ҝәнҹә сакинләри олан Һөҹҹәтүл Ислам Рузи Исмајылов, Һөҹҹәтүл Ислам Рамил Сејфуллајев вә Исламчы активист Мүбариз Ибраһимов мәһкәмәдә ифадә верәркән адлары чәкилән шәхсләрин онлара дәһшәтли ишҝәнҹәләр вермәсиндән, инсан ләјагәтини алчалдан һәрәкәтләрдән данышмышдылар. Сөзүҝедән полисләр мәһкәмәдә диндириләндә онларын еләдикләрини үзләринә дә демишдиләр.
Һөҹҹәтүл Ислам Рузи Исмајылов вәсатәтини әсасландыраркән билдириб ки, бу адамлар ишҝәнҹә вермәкләри бир јана, мәһкәмәдә дә онлары тәһгир едибләр, Огтај Оруҹов јалан ифадә вериб. Оруҹов ШӘРЛӘНӘН шәхсләрдән биринин сахланыларкән ону “вурдуғуну” иддиа едиб.
Вәсатәт бахылмамыш сахланылыб.
Һөҹҹәтүл Ислам Рузи Исмајыловун икинҹи вәсатәти Расим Гурбанов вә Огтај Оруҹовун мәһкәмә-психиатрик експертизасындан кечирилмәси барәдә олуб. Һөҹҹәтүл Ислам Рузи Исмајылов һәмин шәхсләрин мәһкәмәдә ифадә верәркән гејри-нормал һәрәкәтләр етмәләри илә әсасландырыб.
Һаким Зејнал Ағајев вәсатәтин јазылы шәкилдә верилмәли олдуғуну билдириб. Һөҹҹәтүл Ислам Рузи Исмајылов нөвбәти просесдә јазылы вәсатәти тәгдим едәҹәјини дејиб.
Президентин сәрәнҹамы неҹә олду?
Даһа сонра Исламчы активист Һаҹы Елхан Һәсәновун вәкили Рамиз Мәммәдов мүдафиә етдији шәхсин ев дустаглығына бурахылмасы барәдә вәсатәт вериб. Вәкил билдириб ки, Елхан Һәсәнов барәсиндә һәбс гәтимкан тәдбиринин сечилмәси үчүн һеч бир әсас олмајыб. Мүдафиәчинин сөзләринә ҝөрә, Елхан Һәсәнов Нардаран һадисәләри заманы өлкәдән кәнарда олдуғу һалда, она 10 маддә илә иттиһам верилиб. Вәкил илбтидаи истинтагын дүзҝүн апарылмадығыны, Елхан Һәсәновун евиндә ахтарышы истинтаг групунун үзвү олмајан шәхсин апардығыны, истинтаг групунун үзвләриндән биринин һеч бир сәнәддә имзасынын олмадығыны вә имзасы олмајан шәхсдән ифадә алындығыны дејиб.
Рамиз Мәммәдов һәмчинин Елхан Һәсәнов барәсиндә сечилмиш һәбс гәтимкан тәдбиринин президентин ҹәза сијасәтинин һуманистләшдирилмәси барәдә 10 феврал 2017-ҹи ил тарихли сәрәнҹамындан доған мәсәләләрә хидмәт етмәдијини, һәбсин ганунсуз вә әсассыз олдуғуну дејиб. Вәкил 2017-ҹи илин ислам һәмрәјлији или олмасыны хатырладараг, һакимдән исламчы илә һәмрәјлик нүмајиш етдирмәсини истәјиб.
Амма бу вәсатәт дә тәмин едилмәјиб.
“Јазмалыјдым ки, ҝуја мәндә силаһ вар”
Даһа сонра ДИН-ин Баш Мүтәшәккил Ҹинајәткарлыгла Мүбаризә Идарәсинин (бандотдел) әмәкдашлары шаһид гисминдә диндирилиб. Әввәлҹә идарәнин баш әмәлијјат мүвәккили Ибраһим Казымов ифадә вериб.
Казымовун кимлији һәлә Мүсәлман Бирлији Һәрәкатынын сәдри Тале Бағырзадә, АХҸП сәдринин мүавини Фуад Мустафајев вә даһа 16 нәфәрин мәһкәмәсиндән мәлумдур. Онун диндирилдији мәһкәмә иҹласлары галмагалла јадда галмышды. Чүнки Талеһ Бағырзадә, еләҹә дә “бандотдел”дә сахланылан диҝәрләри орада онлара ән чох вә дәһшәтли ишҝәнҹә верәнләрдән биринин мәһз Ибраһим Казымов олдуғуну билдирмишдиләр.
Буҝүнкү мәһкәмәдә Ибраһим Казымов ШӘРЛӘНӘН Исламчы активист Фаиг Аллаһвердијеви сахладыгларыны билдириб: “2016-ҹы ил јанварын 21-дә Самур сәрһәд-кечид мәнтәгәсинин әмәкдашлары бир нәфәри сахлајараг Идарәјә ҝәтирдиләр. Һәмин шәхс етираф етди ки, евиндә силаһ-сурсат вар. 3 нәфәр Идарәнин әмәкдашы вә 2 нәфәр һал шаһиди илә бирликдә евинә ҝетдик, әризә јазды ки, евиндә ахтарыш апарылмасына етираз етмир. Евә ҝирдик, һеч ким јох иди, евдә гумбара вә тратир шашкасы ашкар едилди. Сәнәдләшдирдик вә Идарәјә ҝәлиб протоколлашдырдыг”.
Казымов вәкилләрин суалларына ҹаваб верәрәкән евин отагларынын сајынын нә гәдәр олмасыны хатырламајыб. Дејиб ки, һәмин әмәлијјатдан сонра чох әмәлијјатларда иштирак едиб, она ҝөрә дә јадында галмајыб. О, әмәлијјат заманы видеочәкилиш апарылдығыны дејиб.
Шаһидин дедикләри илә бағлы чарпаз диндирмә заманы Фаиг Аллаһвердијев исә бунлары дејиб: “Белә разылашдырылды ки, мән јазым, ҝуја мәндә силаһ вар”.
Ахтарыш апарылан заман евдә адам олдуғуну, идарәнин әмәкдашалрынын евә ҝирмәјәрәк, јалныз евин зирзәмисинә дахил олараг, өзләри гојдуларыны өзләринин дә ҝөтүрдүкләрини дејиб.
Вәкил Бәһруз Бајрамовун “Сизҹә 26 нојабр 2015-ҹи ил тарихли Нардаран һадисәсиндән сонра бу шәхс һансы мәнтиглә силаһ сахлајарды?” суалыны полисин ҹавабландырмасына һаким имкан вермәјиб: “Биз бурада мәнтиг мәсәләләринә бахмырыг”.
Ибраһим Казымов она верилән суаллара ҹаваб олараг әмәлијјатын 30-40 дәгигә чәкдијини билдириб, лакин Фаиг Аллаһвердијев әмәлијјатын 3-5 дәгигә чәкдијини дејиб.
“Мән һеч вахт үзә дурмамышам. Һеч нәдән хәбәрим јохдур, нијә мәнә о гәдәр маддә гојмусунуз? Иншаллаһ Сиратда ҝөрүшәҹик”, – дејә ШӘРЛӘНӘН Исламчы активист Фаиг Аллаһвердијев инсанлыгдан узаг дүшмүш Ибраһим Казымова дејиб.
Даһа сонра БМҸМИ-нин инсанлыгдан узаг дүшмүш башга бир “әмәлијјат мүвәккили” Меһман Тејмуров ифадә вериб. О да ШӘРЛӘНӘН шәхсләрдән јалныз Фаиг Аллаһвердијеви таныдығыны дејиб: “21 јанвар 2016-ҹы илдә Фаиг Аллаһвердијеви ҝәтирдиләр Идарәјә. Сонра евинә бахыш кечирилди. Зирзәмидән 2 гумбара, 3 әдәд китабча ашкар едилди. Сәнәдләшдирилди вә Идарәдә протоколлашдырылды”.
Вәкил Зибејдә Садыгованын “Сиз ашкар едилән китабчаны охумусунуз?” (“Талеһ Бағырзадәнин мүраҹиәти” адлы китабча. Бағырзадә билдирир ки, бу китабчанын она һеч бир аидијјәти јохдур, онларын һәбсиндән сонра һүгуг-мүһафизә органлары өзләри дүзүб-гошублар) суалына шаһид “Бәјәм ора китаб охумаға ҝетмишдим?“ ҹавабыны вериб. Вәкилин “Бәс елә исә нијә башга китаблары јох, һәмин китабчаны ҝөтүрмүсүнүз?” суалына исә шаһид Тејмуров “Мәликмәммәдин нағылы олан китабы ҝөтүрәси дејилдим ки!” ҹавабыны вериб.
ШӘРЛӘНӘН Меһман Гулијевин дә “Нијә башга китаблары јох, анҹаг о китабы ҝөтүрмүсүнүз?” суалына исә шаһид “Бу суала ҹаваб вердим дә. Сән дејәсән бизим сөһбәтимизә гулаг асмырдын” ҹавабыны вериб.
“Евимизин гапысыны сындырдылар, атамы да тутдулар”
Даһа сонра идарәнин инсанлыгдан узаг дүшмүш нөвбәти әмәкдашы Камил Мәммәдов ифадә вериб. О, ШӘРЛӘДИКЛӘРИ Исламчы активист Меһман Гулијеви таныдығыны десә дә, ШӘРЛӘНӘН шәхсләр арасында ону таныја билмәјиб.
Камил Мәммәдов 26 нојабр 2015-ҹи илдә Нардаранда кечирилмиш әмәлијјатдан сонра Меһман Гулијевин сахланылмасы әмәлијјатында да иштирак етдијини билдириб: “Мәнә әмәлијјат мәлуматы дахил олмушду, әмәлијјат групу јарадылды, група мән рәһбәрлик едирдим. Ҝетдик Нардарана, 1 декабр 2015-ҹи илдә Меһман Гулијевин евинин гаршысында әмәлијјат мөвгеји сечдик. О дарвазадан чыханда сахладыг. Разылыг әризәсини алыб, ахтарыш үчүн евинә ҝетдик, өзү деди ки, гонаг вә јатаг отағында нәсә вар. Гонаг отағында хәнҹәр вар иди, јатаг отағындакы сијирмәдән дә 2 гумбара, 10 әдәд патрон вә чағырышлар олан 3 әдәд китабчаны өзү бизә верди, габлашдырдыг, Идарәдә протоколлашдырдыг”.
Вәкилләрин суалларына ҹаваб верәркән Камил Мәммәдов әмәлијјатда мүлки ҝејимдә олан 3 нәфәр Идарәнин әмәкдашынын-онун, Ислам Ағабәјовун вә Шаһлар адлы диҝәр әмәкдашын, 2 нәфәр һал шаһидинин иштирак етдијини дејиб. Лакин Меһман Гулијев евинә 3 нәфәр јох, 15 нәфәрин ҝәлдијини, һәмин шәхсләрин мүлки ҝејимдә јох, хүсуси ҝејимдә вә маскада олдугларыны, онларын евинин гапысыны тәпиклә сындырыб ачдыгларыны дејиб. О, атасынын да сахланылдығыны, лакин сонрадан ону бурахдыларыны билдириб. Шаһид исә әмәлијјат заманы башга һеч кимин сахланылмадығыны дејиб.
Камил Мәммәдов әмәлијјат заманы видеочәкилишдән истифадә олунмадығыны билдириб. Һалбуки диҝәр шаһид Казымов видеочәкилишдән истифадә олундуғуну демишди.
“О бурахылмаса, биз дә мәһкәмәдә иштирак етмәјәҹәјик”
Исламчы активист Меһман Гулијев евиндә ахтарыш апарылмасы барәдә әризәни ахтарышдан сонра идарәдә Камил Мәммәдовун ону дөјәрәк алдығыны дејиб.
Бу заман ШӘРЛӘНӘН Гуран Һафизи Һөҹҹәтүл Ислам Зүлфүгар Микајылов дејиб: “Ҝетсин ермәнини вурсун. Ермәнинин габағындан гачыблар. Бурада елә данышыр ки, елә бил гәһрәманлыг едиб”.
Әдаләтсиз һаким исә, Һөҹҹәтүл Ислам Зүлфүгар Микајылова дејиб ки, она сонунҹу дәфә хәбәрдарлыг едир, бир дә белә һал тәкрарланса, ону зала бурахмајаҹаг.
Диҝәр ШӘРЛӘНӘН шәхсләр Һөҹҹәтүл Ислам Зүлфүгар Микајыловун зала бурахылмајаҹағы һалда, онлар да просесдә иштирак етмәјәҹәкләрини билдирибләр.
ШӘРЛӘНӘН Меһман Гулијевлә шәхсијјәтини пагона сатмыш полис Камил Мәммәдов арасында белә диалог олуб:
– Бизим евимизин ики гапысы вар, бири бөјүкдүр, бири исә кичик. Сиз һансындан һәјәтә ичәри дахил олдунуз?
– Дарвазадан.
– Бизим дарвазамыз јохдур, гапыларымызын исә икиси дә кичикдир. Дедијиниз силаһ-сурсаты һарадан тапдыныз?
– Ҝөј рәнҝли долабдан.
– Бизим белә рәнҝдә мебелимиз јохдур.
Даһа сонра Һөҹҹәтүл Ислам Зүлфүгар Микајылов гурама мәһкәмә просесинә етираз әламәти олараг полис Камил Мәммәдова дејиб: “Сиз дејирсиниз сорушдуг, о да чыхарыб өзү тәгдим етди. Бир адам әҝәр дөвләт чеврилиши етмәк истәјирсә, она неҹә инанмаг олар ки, 2 гумбарадан башга силаһы јохдур? Бәлкә елә инди дә силаһ сахлајыр евдә?”
Әдаләтсиз һаким исә нөвбәти дәфә полис мәмурунун тәрәфини сахлајараг онун әвәзинә дилләнәрәк дејиб: “Биз шаһидлә бағлы “Әл-Ниса” сурәсини сорушмуруг ки. Сән дә Ҹинајәт Просессуал Мәҹәлләјә ујғун вер суалы”.
Гејд едәк ки, гурама мәһкәмәнин нөвбәти просеси мајын 1-дә баш тутаҹаг.
Диггәт: Хәбәрдән истифадә етдикдә мәнбәјә истинад лазымдыр
