Азәрбајҹан Ислам Партијасы Нетанјаһонун Бакы сәфәринә кәскин ЕТИРАЗ етди – Бәјанат

Әһли Бејт (әлејһимус-сәлам) - АБНА – Хәбәр Аҝентлијинин вердији хәбәрә әсасән, Азәрбајҹан Ислам Партијасы ишғалчы сионист режимин баш назири Бенјамин Нетанјаһунун ҝәлән һәфтә Азәрбајҹана нәзәрдә тутулан сәфәри илә бағлы етираз бәјанаты јајыб.
Бәјанатда дејилир:

“Мәсләји өлдүрмәкдән, алчалдараг уҹалмагдан ибарәт олан зүмрәләр Аллаһын досту ола билмәзләр. Мәзлум Фәләстин халгынын башына 70 илдән артыг бәлалар ҝәтирән Исраил сионист режиминин рәһбәрләри белә зүмрәләрдәндир. Бу халгын тарихиндән елә бир ил өтмәмишдир ки, режиминин ганичән әсҝәрләри фәләстинли мүсәлманларын ҹаванларыны, көрпә вә гоҹаларыны, һәтта гадынларыны гәтлиама мәруз гојмасын, торпагларында Аллаһ дүшмәнләри ат ојнатмасынлар. Әлијалын фәләстинлиләр сионист режимин ән модерн силаһларындан истифадә олунмагла гәтлә јетирилир.

Рәһм вә мәрһәмәтдән узаг олан Исраил һаким даирәләринин нүмајәндәләриндән бири, башга сөзлә, биринҹиси Бинјамин Нетанјаһу бу ҝүнләрдә Азәрбајҹана сәфәри ҝөзләнилир. Сәфәр ики мүсәлман өлкәсинә- Азәрбајҹан вә Газахстана нәзәрдә тутулур.

Сәфәрдә әсас мәгсәд ҝизли сахланса да сәмимилији шүбһә доғурур. Әслиндә гәддар ҹәлладын бир гардашын башын кәсиб диҝәринин башын сығаллајаҹағына инанмаг садәлөвһлүк оларды. Бу мәнада Азәрбајҹан бу ҝүн она стратежи әмәкдашлыг тәклиф едән өлкәләри диггәтлә сечмәли, мүсәлман олдуғумуза ҝөрә динимизә, инанҹымыза бәсләдији мүнасибәтә ҹидди өнәм вермәлидир. Чүнки өлкәмиз ишғалчы режимләрин дәстәји илә торпагларынын 20 фаизини итирмишдир.Тарихини ишғалчылыгла јазыб јарадан, һөкмүнү дүнја халгларына гәддарлығы илә диктә едән бир режимдән хејирли нәсә ҝөзләмәк, инсанлыға мүсбәт төһфәләр вермәк чәтиндир.

Исраил Баш Назири Бинјамин Нетанјаһунун мүгәддәс мүсәлман Азәрбајҹан торпағына сәфәрини Азәрбајҹан Ислам Партијасы гәтијјәтлә рәдд едир. Әлләри мәзлумларын ганына батмыш бирисинин өлкәмизә сәфәри, ајағыны мүсәлман торпагларына басмасы јолверилмәздир. Биз инанырыг ки, бу сәфәр Азәрбајҹана һеч бир башуҹалығы ҝәтирмәз вә нәинки мүсәлман дүнјасында, дүнјанын әксәр өлкәләриндә халгымызын имиҹинә, дөвләтчилијимизә хәләл ҝәтирәҹәк. Бу ҝүн әмәлләринә ҝөрә Нетанјаһу бәшәри ҹинајәткар кими АБШ-да, Бөјүк Британијада, һәтта Исраилин өзүндә белә нифрәтлә гаршыланыр, бәзи һалларда һаггында ҹинајәт иши галдырылыр.

Бүтүн бунлары нәзәрә алыб АИП Бенјамин Нетанјаһунун Бакы сәфәринә гәтијјәтлә етираз едир, өлкә рәһбәрлијинин мүсәлманларын вә Ислам дининин, бүтөвлүкдә инсанлығын реал дүшмәни сајылан шәхсин бу сәфәринә манеә төрәтмәсини мәгсәдәујғун һесаб едир. Бунунла халгымыз бу арзуолунмаз сәфәрин мәнәви зәрәриндән хилас олунмуш олаҹаг.”

Азәрбајҹан Ислам Партијасы
10.12.2016


Диггәт: Хәбәрдән истифадә етдикдә мәнбәјә истинад лазымдыр