Әһли Беjт (әлеjһимус сәлам) -АБНА- Хәбәр Аҝентлиjинин вердиjи хәбәрә әсасән, Јәһуди Хәбәрләр Аҝентлиjинин (ЈХА) саjтында “Азәрбаjҹан Президенти jәһудиләри Рош-Һа-Шана мүнасибәтилә тәбрик едиб” сәрлөвһәли мәгалә jерләшдирилиб.
Мәгаләдә деjилир ки, Азәрбаjҹан Президенти Илһам Әлиjев jәһуди халгынын jени ил баjрамы – Рош-Һа-Шана мүнасибәтилә республиканын jәһуди иҹмаларына тәбрик мәктубу ҝөндәриб.
Президент Илһам Әлиjевин республиканын jәһуди иҹмаларына мәктубунда вурғуланыр ки, Азәрбаjҹан аjры-аjры дин вә мәдәниjjәтләр арасында гаршылыглы анлашманын, һөрмәт вә етимадын һөкм сүрдүjү надир өлкәләрдәндир. Ҹәмиjjәтимиздә етник-мәдәни мүхтәлифлиjин вә мултикултурал әнәнәләрин горунуб сахланылмасы, милли азлыгларын дил вә мәдәниjjәтинин инкишаф етдирилмәси дөвләт сиjасәтинин башлыҹа истигамәтләриндән биридир.
Азәрбаjҹан дөвләтинин башчысы билдириб ки, Рош-Һа-Шана өзүндә jенилиjи, мәнәви сафлығы вә һәмрәjлиjи тәҹәссүм етдирән баjрамдыр. Азәрбаjҹан Республикасы Президентинин өлкәнин jәһуди иҹмаларына үнванланан тәбрик мәктубу бу сөзләрлә битир:
“Јәһуди халгынын бу әзиз ҝүнү мүнасибәтилә бир даһа һамыныза сәмими тәбрикләрими чатдырыр, аиләләринизә хошбәхтлик, сүфрәләринизә рузи-бәрәкәт арзулаjырам”.
Азәрбаjҹанын дағ, ашкенази вә Ҝүрҹүстан jәһудиләри дини иҹмаларындан ЈХА-jа билдирибләр:
”Бизи гаршыдан ҝәлән Рош-Һа-Шана баjрамы мүнасибәтилә тәбрик етдиjинә ҝөрә Президент Илһам Әлиjевә сәмими-гәлбдән миннәтдарыг. Президентимизин мәктубундакы меһрибан вә сәмими сөзләр Азәрбаjҹан халглары арасында сүлһ вә һәмрәjлиjи долғун әкс етдирир. Гоj гаршыдан ҝәлән 5775-ҹи ил бүтөвлүкдә Азәрбаjҹан үчүн, республикамызын бүтүн халглары вә конфессиjалары үчүн ҝөзәл вә уғурлу ил олсун!”
Диггәт: Хәбәрдән истифадә етдикдә мәнбәjә истинад лазымдыр
24 sentyabr 2014 - 13:50
Xəbər kodu: 639918
Јәһуди Хәбәрләр Аҝентлиjинин (ЈХА) саjтында “Азәрбаjҹан Президенти jәһудиләри Рош-Һа-Шана мүнасибәтилә тәбрик едиб” сәрлөвһәли мәгалә jерләшдирилиб
