Әһли Беjт (әлеjһимус сәлам) -АБНА- Хәбәр Аҝентлиjинин вердиjи хәбәрә әсасән, Азәрбаjҹан вә Тәбриз Тибб университетләри арасында протокол jениләниб
Бу ҝүн Азәрбаjҹан Тибб Университетиндә (АТУ) Иран Ислам Республикасынын Тәбриз Тибб Университетиндән ҝәлән нүмаjәндә һеjәти илә ҝөрүш кечирилиб.
Университетин мәтбуат хидмәтиндән верилән хәбәрә ҝөрә, ҝөрүшдә АТУ-нун ректору, академик Әһлиман Әмирасланов, Тәбриз Тибб Университетинин ректору Мәһәммәдһүсеjн Суми, Иранын өлкәмиздәки сәфири Мөһсүн Пак Аjин вә Теһранын сәһиjjә саһәсиндә диҝәр танынмыш мүтәхәссисләри иштирак едибләр.
Ҝөрүш заманы ректор, милләт вәкили Әһлиман Әмирасланов АТУ-нун Тәбриз Тибб Университети илә сых әмәкдашлығынын олдуғуну хатырладараг мүнасибәтләрин даһа да ҝенишләндирилмәсинә еһтиjаҹ олдуғуну геjд едиб: “Иран Ислам Республикасынын бүтүн али мәктәбләри, үмумиjjәтлә сәһиjjә системи илә әлагәләримиз ҝенишдир. Лакин Тәбриз Тибб Университети илә мүнасибәтләримиз даһа jахындыр. Индиjә кими дәфәләрлә гаршылыглы сәфәрләримиз олуб. Университет Азәрбаjҹан үчүн һәким, әҹзачы, стоматолог һазырлаjан jеҝанә тибби мүәссисәдир. Университетимизә илдә 1000 нәфәрә jахын тәләбә гәбулу апарылыр. Хариҹи өлкәләрдән дә Тибб Университетинә ахын вар, мараг чох бөjүкдүр. Һәтта мүраҹиәт едәнләрин һамысыны гәбул едә билмирик. Ирандан һазырда университетимиздә 300-дән чох тәләбә тәһсил алыр”.
Тәбриз Университетинин ректору Мәһәммәдһүсеjн Суми дә мүнасибәтләрин мөһкәмләндирилмәсинин тәрәфдары олдуғуну билдириб. О, Тәбриз Тибб Университети илә АТУ арасында протоколун jениләнмәсинә еһтиjаҹ олмасы фикри илә разылашдығыны сөjләjиб. Ректор Суми рәһбәрлик етдиjи али тәһсил мүәссисәси илә әлагәдар мәлумат вериб, Азәрбаjҹанла jанашы, диҝәр өлкәләрин университетләри илә әлагәләрин ҝүҹләндириләҹәjини билдириб.
Сонда Азәрбаjҹан Тибб Университети вә Тәбриз Тибб Университети арасында сазишин jенидән имзаланмасы мәрасими баш тутуб. Сәнәд ики университет арасында мүтәхәссисләрин вә тәләбәләрин мүбадиләси, бирҝә конфранс вә симпозиумларын кечирилмәси, ихтисасартырма курсларынын тәшкили вә диҝәр бирҝә фәалиjjәти нәзәрдә тутур.
Диггәт: Хәбәрдән истифадә етдикдә мәнбәjә истинад лазымдыр
APA.AZ
