Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Иран Ислам Республикасынын Мүдафиә вә Силаһлы Гүввәләрә дәстәк назири Һүсејн Деһганын дәвәти илә Теһрана рәсми ишҝүзар сәфәр едән Азәрбајҹанын мүдафиә назири, ҝенерал-полковник Закир Һәсәнов бу ҝүн Теһранда иранлы һәмкары Һүсејн Деһганла ҝөрүшүб.
Апа-нын ИРНА аҝентлијинә истинадла вердији мәлумата ҝөрә, З.Һәсәновун шәрәфинә рәсми гәбул мәрасими кечирилиб. З. Һәсәнәов Ираг-Иран мүһарибәсиндә шәһид дүшәнләрин мәзарыны зијарәт етдикдән сонра Иран Ислам Республикасынын Мүдафиә Назирлијиндә Азәрбајҹан вә Иран Ислам Республикасы мүдафиә назирләри арасында данышыгларын илк мәрһәләси кечирилиб. Ҝөрүшдә икитәрәфли һәрби әмәкдашлыг, еләҹә дә сијаси, һәрби вә реҝионал тәһлүкәсизлик мәсәләләри әсас мүзакирә мөвзусу олуб.
Һ.Деһган Иран Ислам Республикасы вә Азәрбајҹанын ортаг мәдәни вә дини дәјәрләрә саһиб олдуғуну билдириб: “Халгларымыз арасында достлуг вә гардашлыг мүнасибәтләри узун мүддәтдир давам едир. Ики өлкә арасында сијаси, игтисади, мәдәни, тәһлүкәсизлик вә мүдафиә саһәси дә дахил олмагла бүтүн саһәләрдә әлагәләрин инкишафы үчүн бөјүк потенсиал вар. Иран Ислам Республикасы илә Азәрбајҹан да өз потенсиалларындан гаршылыглы әмәкдашлыг мәгсәдилә истифадә едә биләр”.
Һ.Деһган Иран Ислам Республикасы Мүдафиә Назирлијинин Азәрбајҹанын мүдафиә саһәси үзрә еһтијаҹларыны тәмин етмәјә һазыр олдуғуну билдириб: “Бу сәфәрин ики өлкә арасында мүдафиә вә һәрби саһәдә әлагәләрин даһа да инкишафына тәсир ҝөстәрәҹәјинә үмид едирәм”.
Иран Ислам Республикасынын мүдафиә назири һәр ики өлкәнин сәрһәдләрини достлуг вә гардашлыг сәрһәдләри адландырыб, реҝиондакы терроризм вә радикализмдән данышыб.
З.Һәсәнов исә өз нөвбәсиндә Иран Ислам Республикасына сәфәриндән мәмнун галдығыны дејәрәк, Һ.Деһганы бу өлкәнин мүдафиә назири постуна тәјин едилмәси мүнасибәтилә тәбрик едиб: “Бу сәфәрин ики өлкә арасында мүдафиә саһәсиндә әлагәләрин инкишафына ҝәтириб чыхараҹағына үмид едирәм. Иран бөлҝәдә бөјүк бир өлкәдир, Азәрбајҹанын гоншусу вә достудур вә бу дөвләтлә әмәкдашлыг өлкәмизин хариҹи сијасәтинин приоритетләриндән һесаб олунур. Бу ил ики өлкә арасында әлагәләрин онунҹу илдөнүмүдүр”.
Гејд едәк ки, З.Һәсәнов апрелин 15-дә Иран Ислам Республикасынын Силаһлы Гүввәләринин Баш Гәрарҝаһ рәиси, ҝенерал-полковник Сејид Һәсән Фирузабади илә ҝөрүшәҹәк. Ејни заманда Азәрбајҹанын мүдафиә назиринин Иран Ислам Республикасынын сијаси рәһбәрлији илә ҝөрүшләринин кечирилмәси планлашдырылыр.
Диггәт: Хәбәрдән истифадә етдикдә мәнбәјә истинад лазымдыр
