Әһли Бејт (әлејһимус сәлам) -АБНА- Хәбәр Аҝентлијинин вердији хәбәрә әсасән, Ислам Ингилабынын Али Мәгамлы Рәһбәри Һәзрәт Ајәтуллаһ Хаменеи Азәрбајҹан Республикасынын президенти ҹәнаб Илһам Әлијевлә чәршәнбә ҝүнү ҝүнортадан сонра баш тутан ҝөрүшүндә ики гоншу өлкә олан Иран Ислам Республикасы вә Азәрбајҹан арасындакы тарихи, мәдәни вә дини бағларын икитәрәфли мүнасибәтләрин ҝүҹләндирилмәси үчүн еффектив амил олдуғуну билдирәрәк ашағыдакылары вурғулады: “Биз сијаси ирадәмизи ортаја гојуб әлдә едилмиш разылашмалара ҹидди сурәтдә әмәл етмәклә тәхрибатчы планлара галиб ҝәлмәли, халгларымыз вә дөвләтләримиз арасындакы әлагәләри ҝүнү-ҝүндән даһа да мөһкәмләндирмәлијик”.
“Халга, онун дини инанҹына даһа јахын олмаг һәр бир дөвләтин уғурунун гарантыдыр” – дејән Али Мәгамлы Рәһбәр әлавә етди: “Дини екстремизми јајмаға чалышан бәзи ҹәрәјанларын Ислам мәзһәбләри арасына ихтилаф салараг милли бирлији позмасына имкан вермәк олмаз”.
Һәзрәт Ајәтуллаһ Хаменеи ИИР вә Азәрбајҹан президентләри арасында баш тутмуш данышыглары вә әлдә едилмиш разылашмалары, еләҹә дә мүштәрәк игтисади комиссијанын тәшкилини мүсбәт гијмәтләндирәрәк деди: “Тәрәфләрин имкан вә потенсиалыны нәзәрә алараг ики өлкә арасында гаршылыглы әмәкдашлығын һазырда ашағы сәвијјәдә олдуғуну демәк олар. Үмидварам ки, будәфәки сәфәр игтисади вә реҝионал әмәкдашлығын ҝенишләндирилмәси үчүн бир башланғыҹ олаҹаг”.
Ики өлкә арасында мүнасибәтләрин ҝенишләндирилмәси үчүн сијаси ирадә вә ҹидди нијјәт тәләб олундуғуну билдирән Али Мәгамлы Рәһбәр әлавә етди: “Әлбәттә ки, Иран Ислам Республикасы илә Азәрбајҹан Республикасы арасында әлагәләрин мөһкәмләндирилмәси бәзи дөвләтләрин, о ҹүмләдән Исраил режиминин хошуна ҝәлмир вә онлар даим бу истигамәтдә позуҹу фәалијјәт ҝөстәрирләр. Буна бахмајараг, сијаси ирадә вә ҹидди әзм сајәсиндә бу тәхрибатчы планлара галиб ҝәлмәк мүмкүндүр”.
Иран ИсламРеспубликасын президенти ҹәнаб Һәсән Руһанинин дә иштирак етдији бу ҝөрүшдә Азәрбајҹан Республикасынын президенти Илһам Әлијев Иран Ислам Республикасына сәфәриндән мәмнунлуг ифадә едәрәк икитәрәфли данышыглар үчүн олдугҹа конструктив атмосферин мөвҹуд олдуғуну билдирди. О деди: “Иран вә Азәрбајҹан арасында јарадылмыш мүштәрәк игтисади комиссија елә бу ҝүндән өз ишинә старт верир. Ҹари сәфәр бүтүн сфераларда, о ҹүмләдән сәнаје, тиҹарәт, нәглијјат вә туризм секторунда әмәкдашлығын артырылмасы үчүн әсас ролуну ојнајаҹаг”.
Дини екстремизмин һәр ики өлкәни нараһат едән бир мөвзу олдуғуну гејд едән Илһам Әлијев Иран вә Азәрбајҹан халглары арасында тарихи-мәдәни бағларын мөвҹудлуғуну тәсдигләјәрәк деди: “Иранла әмәкдашлығын ҝенишләндирилмәси мәсәләсиндә Азәрбајҹан Республикасынын сијаси ирадәси ҹидди вә гәтидир”.
Азәрбајҹан президенти һәмчинин Иран Ислам Республикасынын Али Мәгамлы Рәһбәрин истигамәтләндирмәси сајәсиндә дүнја вә реҝионда јүрүтдүјү мүстәгил сијасәтин диҝәр дөвләтләрә нүмунә олдуғуну гејд едәрәк деди: “Биз Иранын гүдрәтини өз гүдрәтимиз һесаб едирик вә ики өлкә арасындакы мөһкәм бағлар кимләринсә мүнасибәтләримизә мәнфи тәсир ҝөстәрмәсинә имкан вермәјәҹәк”.
Диггәт: Хәбәрдән истифадә етдикдә мәнбәјә истинад лазымдыр
