Әһли Беjт (әлеjһимус сәлам) -АБНА- Хәбәр Аҝентлиjинин вердиjи хәбәрә әсасән, Малиjjә Назирлиjи “Советски”дә нәзәрдә тутулан сөкүнтү ишләри вә бурада дашынмаз әмлака малик олан мүлкиjjәтчиләрә тәклиф олунан мәбләғ барәдә ачыглама вериб.
Назирлиjин ачыгламасында деjилир: “Мәлум олдуғу кими, һәр һансы дөвләт гуруму тәрәфиндән иҹра олунан лаjиһәләр, мүхтәлиф инфраструктурларын тикинтиси вә бу заман һәjата кечирилән көчүрүлмәләр вә мүликиjjәтчиләрдән әмлакын алынмасы дөвләт бүдҹәсинин вәсаити һесабына тәмин олунур вә Малиjjә Назирлиjинин мүвафиг структурлары тәрәфиндән малиjjәләшмә апарылыр.
“Советски” адландырдығыныз әразиjә ҝәлинҹә билдиририк ки, бурада евләрин алынмасы там көнүллүлүк принсипи әсасында һәjата кечирилир. Азәрбаjҹан Республикасы Баш Назиринин мүавини Абид Шәрифовун 21 феврал 2014-ҹү ил тарихиндә мәтбуата вердиjи мүсаһибәдә билдирдиjи кими, һәмин әразидә jашаjан әһалиjә мәхсус әмлакларын, мәнзил вә торпаг саһәләринин дөвләт еһтиjаҹлары үчүн мәҹбури гаjдада алынмасы нәзәрдә тутулмамышдыр. Белә ки, һәмин әразидә jерләшән әмлакларын мүлкиjjәтчиләри (саһибләри) өз ирадәләринә, мүлкү һүгуг принсипләринә вә Азәрбаjҹан Республикасында гүввәдә олан мүлкү ганунвериҹилиjин тәләбләринә уjғун олараг, өз әмлакларыны там көнүллү сурәтдә дөвләтә сата биләрләр. Бу әразидә jерләшән әмлакларын дөвләт тәрәфиндән алынмасы заманы, әмлакын фактики үмуми саһәсинин һәр бир квадрат метринин дәjәри 1500 (бир мин беш jүз) манат һәҹминдә jухары һәдд мүәjjән олунмушдур. Геjд едилән мәбләғин мүәjjән олунмасы үчүн һәмин әразидә кифаjәт гәдәр тәһлилләр апарылмыш вә мүстәгил експерт рәjләри нәзәрә алынмышыдыр.
Белә ки, геjд олунан саһәнин Бакы шәһәринин мәркәз һиссәсинә jахын әразидә jерләшмәсинә бахмаjараг, бир сыра амилләр һәмин әразидә jерләшән әмлакларын базар дәjәринә мәнфи тәсир ҝөстәрмәкдәдир. Белә ки, әразидә jерләшән тикилиләрин бөjүк әксәриjjәти буҝүнки шәһәрсалма гаjда вә тәләбләринә уjғун ҝәлмир, jашаjыш саһәләри мүвафиг тәһлүкәсизлик вә jашаjыш үчүн мүәjjән едилмиш үмуми тәләбләрә ҹаваб вермир, коммунал, коммуникасиjа вә диҝәр инфрструктур системләри гәнаәтбәхш вәзиjjәтдә деjил вә онларын jенидән гурулмасы үчүн хүсуси тәjинатлы техниканын әразиjә дахил олмасында дарысгал, енсиз jоллар ҹидди манеәләр jарадыр.
Геjд олунанлары нәзәрә алмагла, ҝөстәрилән мәбләғин мүәjjән олунмасы илә бағлы гәрары әмлак базарынын реаллыгларыны адекват әкс етдирән вә кифаjәт гәдәр әдаләтли һесаб етмәк олар.
Мүвафиг дөвләт органларында мөвҹуд олан мәлуматларын тәһлили нәтиҹәсиндә, сон дөврләрдә әразидә алгы-сатгы олунмуш әмлакларын һәр бир фактики квадрат метринин дәjәринин 1500 манатдан даһа аз олдуғу мүәjjән едилмишдир. Бүтүн бунларла белә, геjд олунан әразидә мүлкиjjәтчиләрә дөвләт бүдҹәсинин вәсаити һесабына әмлакларын алынмасы үчүн мүәjjән олунмуш ән jухары һәдд - 1500 манат тәклиф олунур.
Беләликлә, тәклиф олунан гиjмәтә разы олмаjанлар өз евләриндә, сөзүҝедән әразидә әввәлки гаjдада jашамагда давам едирләр. Өз әмлакларыны геjд олунан гиjмәтә сатмаға разы оланлар исә, мүвафиг гурумлара мүраҹиәт едәрәк алгы-сатгыны рәсмиләшдирирләр. Артыг 100-ә jахын мүлкиjjәтчи илә алгы-сатгыjа даир мүвафиг разылашма сәнәди имзаланыб вә онларын пул вәсаити банкдакы һесабларына көчүрүлүб".
Беләликлә дә “Советски” ҹамаатынын етиразларына бахмаjараг һакимиjjәт онлара ҝүзәштә ҝетмәк ниjjәтиндә ҝөрүнмүр. Хатырладаг ки, “Советски” ҹамааты верилән компенсасиjаjа етираз олараг февралын 17-дә аксиjа кечирмишдиләр. Һөкумәт сакинләринин тәләбләринин нәзәрә алынаҹағыны билдирмишди. “Советски” сакинләри исә компенсасиjанын мәбләғинин артырылмаjаҹағы тәгдирдә мартын 3-дә jенидән аксиjа кечирәҹәкләрини бәjан етмишди.
Диггәт: Хәбәрдән истифадә етдикдә мәнбәjә истинад лазымдыр
