Әһли Беjт (әлеjһимус сәлам) -АБНА- Хәбәр Аҝентлиjинин вердиjи хәбәрә әсасән, бу ҝүн Сәбаил Раjон Мәһкәмәсиндә Бәхтиjар Гурбанов вә Рөjал Әсҝәровун нөвбәти мәһкәмә иҹласы кечирилиб.
Илк олараг шаһидләрдән Нәсими Раjон Полис Бөлмәсиндән әмәлиjjатчы Мушфиг Шүкүров ифадә вериб. О, Бәхтиjар Гурбанов вә Рөjал Әсҝәровун сахланылмасындан данышыб:
- "Сәһәр саат 5, 6-jа ишләмиш оларды. Бу икисини әлләриндә сумка ҝөрдүк. Шүбһә jаранды. Өзүм jахынлашдым. Вәсигәми тәгдим етдим. Сорғу-суал етдим. Зиддиjәтли ифадәләр ишләтдиләр. Сонра гачмаға башладылар. Даһа сонра онлары сахладыг бөлмәjә ҝәтирдик. Һәмин вахтларда әразидә дүканлардан оғурлуглар олурду. Бунлары да о шүбһәjлә сахладыг. Өз истәкләрини һеч бир тәjзигсиз ифадә етдиләр ки, мәктәбләрдәки һиҹаб гадағасына вә Тале Бағыровун һәбсинә етираз етмәк мәгсәдиjлә Бакы Шәһәр Иҹра Һакимиjjәтинин гапысыны jандырмаг истәjирләрмиш. Әввәлҹәдән мүшаһидә апардыгларыны да дедиләр. Бизә гаршы мүгавимәт дә ҝөстәрмәдиләр. Бу ниjjәтләриндән дә пешманчылыг чәкмәдикләрини билдирдиләр."
Даһа сонра һаким Бәхтиjар Гурбанов вә Рөjал Әсҝәровдан ифадә вермәк истәмәләри барәдә сорушду. Илк олараг Бәхтиjар Гурбанов шаһид динләмәләринин там битмәсиндән сонра ифадә вермәк истәдиjни билдирди. Амма вәкил илә мәсләһәтләшдикдән сонра онлар ифадә вермәjә разылыг вердиләр.
Бәхтиjар Гурбанов:
- "Март аjынын 29-у иди. Рөjал илә Бакыхановдакы Имам Рза (әлеjһис сәлам) Мәсҹидинин jанында зәнҝләшиб ҝөрүшдүк. Һиҹаб гадағасындан, шәрләнәрәк һәбс едилән диндарлардан, һаҹы Тале Бағыровун бәзи дөвләт гурумлары тәрәфиндән тәһдид едилмәсиндән данышдыг. Мән Рөjала бу мәсәләләрә етираз үчүн планымы данышдым ки, Бакы Шәһәр Иҹра Һакимиjjәтинин гапысыны jандырмаг фикриндәjәм. О да мәнимлә разылашды. 2 дәфә Иҹра Һакимиjjәтинин әтрафында мүшаһидә апармышыг. Ахырынҹы дәфә апрел аjынын 1-и мүшаһидә апардыгдан сонра Бакыханов гәсәбәсинә гаjытдыг. Маркетдән 2 әдәд 5 литрлик су вә 4 әдәд 1 литрлик су алдыг. Сонра мән памбыг алмаға вә Рөjал исә бензин алмаға ҝетдик. Разылашдырдығымыз кими Сабунчуда паркда ҝөрүшдүк вә орда һазырладыг. Таксиjлә үзү МУМ-а тәрәф ҝетдик вә 2-ҹи дөнҝәдә дүшдүк. Дүшдүкдән 20-30 метр сонра ичиндә 3-4 мүлки ҝеjимлиләр олан хариҹи маркалы автомобил бизә jахынлашды. Сорушдулар ки, бурда галансыныз? Һеч шүбһәләнмәмишдик, неҹә көмәк едә биләҹәjимизи сорушдум. Сумкалары jерә гоjмушдуг. Мәлум оланда ки кимдиләр, икимиз дә фәргли истигамәтләрә гачмаға башладыг. Мәни бир нечә мәһлә аралыда тутдулар. Әмәлиjjатчы деjир мүгавимәт етмәмишик. Онлар мәним үстүмә силаһ чәкәрәк сахладылар. Јохса мүгавимәт едәрдим. Мәни бөлмәjә ҝәтирдикдә Рөjалын да тутулдуғуну ҝөрдүм. 1-2 ҝүн бөлмәдә галдыг. Һеч бир әзиjjәт етмәдиләр. Даһа сонра бизи Нәсими Раjон Баш Полис Идарәсинә апардылар. Сәһв етмирәмсә сорғу-суал едәнләр арасында 2 нәфәр МТН нүмаjәндәси дә вар иди. Даһа сонра бизи Баш Мүтәшәккил Ҹинаjәткарлыгла Мүбаризә идарәсинә апардылар. Голумдакы гандалы елә сыхырдыларки ики голумда ган чалағына дөнмүшдү. Һәр ҝүн сорғу-суал едирдиләр, дөjүрдүләр. Сорғу-суал едәнләр арасында ҝенерал да вар иди. Мәгсәдләри исә бу иди ки, изаһат jазаг ки, бу ишдә һаҹы Тале Бағыроовун тәшкилатчылығы вар. Ирана да бағламаг истәjирдиләр. Һаллбуки мән Иранда һеч олмамышам.
Биз исә етираз үчүн белә бир планы өзүмүз һазырладығымызы билдирирдим. Башга бир иттиһамы, изаһаты гәбул етмиjәҹәjимизи, өлдүрүлсәк дә демәjәҹәjимизи билдирирдик. Өлсәк шәһидик. Тәjин етдикләри вәкилләр дә бир иш ҝөрмүрдүләр, онларын дедикләрини едирдиләр. Һәтта бизим һарда сахланмағымыз 11 ҝүн сонра билиниб. Вәкилләр һеч кимә мәлумат вермирдиләр. 4-5 ҝүн кечмишди, гапы ачылды. Мәним башыма гара маска кечириб бир отаға апардылар. Тәгрибән 40-30 дәгигә мәни тока (електрошок) вердиләр. Сонра өзүмдән ҝетмишдим, ардыны хатырламырам. Мәни о һалда ҝәтириб камераjа атыблар, орада өзүмә ҝәлмишдим. Мәгсәдләр бу иди ки, һаҹы Таленин тәшкилатчылыг етдиjини деjәк. Бәзи башга тәһдидләр дә етдиләр, мән дә билдирдим ки, һеч ҹүрә едә билмәзсиниз, Аллаһын, Имам-Заман (ә) ағанын хүсуси нәзәри вар. Рөjалы да о гәдәр дөjмүшдүләр ки, гандал әлиндә гырылмышды. Адәтләри үзрә сон 1-2 ҝүн бизә хош мүнасибәт ҝөстәрмәjә чалышдылар. Һалбуки бунларын неҹә амансыз, гәддар олдугларыны ҝөрдүк, бунлар Ислам дүшмәнләридир. Истинтаг заманы мәним вәкилим Осман Казымов иди. Бу ишҝәнҹәләр барәдә она демәмәjимин сәбәби вар. Мәнә дедиләр ки, бир шеj десәниз аиләнизи ҝәтириб бурда башга шеjләр едәрик. Бунлардан һәр шеj ҝөзләдиjимдән вәкилә бир шеj демәдим."
Һаким ишҝәнҹә вә из барәдә сорушду. Бәхтиjар Гурбанов әлләриндә гисмән из галдығыны вә кеjләшмәнин исә даһа олмадығыны билдирди. Бу барәдә вәсатәт галдырмамаг барәдә вәкил илә мәсләһәтләшдикдән сонра гәрар верди. Вәсатәтин онсуз да хеjри олмаjаҹағыны билдирди.
Даһа сонра Рөjал Әсҝәров ифадә верди:
- "Јазылы ифадәләримиздән ҝөрдүjүнүз кими Бәхтиjарла ифадәм еjнидир. Әлавә етмәк истәдиjим садәҹә будур ки, бу ишҝәнҹәләр барәдә данышдыгларымыздан сонра кимсә бизи мәзлум билиб, jазыг ҝөрмәсин. Анд олсун Аллаһа, бу ишҝәнҹәләр бизи даһа да мөһкәмләндириб, шүҹаәтләндириб. О сәбәбдән данышырыг ки, бунларын ким олдугларыны халг танысын, билсин. Столунун үстүндә Гуран, башларынын үстүндә Азәрбаjҹан баjрағы олмағына бахмаjын, өзләрини мәсум кими ҝөстәрирләр. Әслиндә исә Азәрбаjҹан халгына хидмәт етмирләр. Кимләрә хидмәт етдикләрини өзләри даһа jахшы билир. Сахландығымыз мүддәтдә өзүмүзү ермәни әсирлиjиндәки кими һисс едирдик. Еjни мүнасибәт ҝөстәрирдиләр. 6 ҝүн аҹлыг етдим, садәҹә һәким ҝәтирирдиләр ки, өлмүшәм jохса сағам. Ишҝәнҹәдән сонра камераjа ҝәтирилдикдә белә бизи узанмаға динҹәлмәjә гоjмурдулар, аjаг үстүндә сахлаjырдылар. Һәтта мәни сорғу-суал едән ҝенерал өзү дә дөjүб. Тутулан заман зәдәләнмишдим. Һеч о заман да бир ағрыкәсиҹини дә вермәдиләр. Азәрбаjҹан халгына хидмәт етмирләр бунлар, зүлм едирләр."
Даһа сонра һаким нөвбәти мәһкәмә иҹласы октjабр аjынын 11-и саат 11:00-а тәjин етди.
Геjд едәк ки, бу ҝүн диндирилмәли олан шаһидләрдән Камран Сеjидовун бү ҝүн өлдүjү барәдә, мәһкәмә залында сөһбәт ҝедирди.
Диггәт: Хәбәрдән истифадә етдикдә мәнбәjә истинад лазымдыр
