Әһли Бејт -АБНА- хәбәр аҝентлијинин вердији хәбәрә әсасән Азәрбајҹан президенти Илһам Әлијев Азәрбајҹан Президентинин Администрасијасы рәһбәринин мүавинләринин тәјин едилмәси һаггында сәрәнҹамлар имзалајыб. Президентин сәрәнҹамлары илә Новруз Исмајыл оғлу Мәммәдов, Зејнал Сәфәр оғлу Нағдәлијев вә Әли Һидајәт оғлу Әсәдов Азәрбајҹан Президентинин Администрасијасы рәһбәринин мүавинләри тәјин едилибләр.
Гејд едәк ки, Новруз Мәммәдов вә Зејнал Нағдәлијев индијәдәк Азәрбајҹан Президентинин Администрасијасында шөбә мүдири, Әли Әсәдов исә президентин игтисади мәсәләләр үзрә көмәкчиси вәзифәләриндә чалышыблар. Президент Администрасијасына академик Рамиз Меһдијев рәһбәрлик едир.
Новруз Исмајыл оғлу Мәммәдов
1947-ҹи илдә Нахчыван Мухтар Республикасы Бабәк рајонунун Шыхмаһмуд кәндиндә доғулуб.Индики Азәрбајҹан Дөвләт Дилләр Университетини битириб вә 1970-1971, 1974-1978, 1981-1997-ҹи илләрдә бу али тәһсил оҹағында мүхтәлиф вәзифәләрдә чалышыб. 1978-1981-ҹи илләрдә Әлҹәзаирдә һәрби тәрҹүмәчи ишләјиб. 1997-ҹи илдән Президент Администрасијасынын хариҹи әлагәләр шөбәсинин мүдиридир. Филолоҝија елмләри намизәди, 1-ҹи дәрәҹә дөвләт мүшавиридир. Фөвгәладә вә сәлаһијјәтли сәфир дипломатик рүтбәси вар.
Зејнал Сәфәр оғлу Нағдәлијев
1957-ҹи илдә Бакыда доғулуб. Индики Бакы Дөвләт Университетини битириб. Совет дөврүндә - 1981-1991-ҹи илләрдә комсомол системиндә мүхтәлиф вәзифәләрдә чалышыб. 1991-1994-ҹү илләрдә Азәрбајҹан Ҝәнҹләр Тәшкилаты Мәркәзи Комитәсинин катиби, 2001-2003-ҹү илләрдә Үмумрусија Азәрбајҹан Конгресинин иҹрачы директору, 2003-2005-ҹи илләрдә Ләнкәран Шәһәр Иҹра Һакимијјәтинин башчысы ишләјиб. 2005-ҹи илдән Президент Администрасијасынын реҝионал идарәетмә вә јерли өзүнүидарәетмә органлары илә иш шөбәсинин мүдиридир. Тарих елмләри доктору, 1-ҹи дәрәҹә дөвләт мүшавиридир.
Әли Һидајәт оғлу Әсәдов
1956-ҹы илдә Бакыда доғулуб. Узун мүддәтдир өлкә президентинин игтисади мәсәләләр үзрә көмәкчисидир. Јени Азәрбајҹан Партијасынын үзвүдүр.
Диггәт: Хәбәрдән истифадә етдикдә мәнбәјә истинад лазымдыр
