Әһли Бејт -АБНА- хәбәр аҝентлијинин вердији хәбәрә әсасән Ислам дининин мүгәддәс шәһәрләри Мәккә вә Мәдинәјә зијарәтә ҝедәнләрин сајы иллик 12 милјона чатыб вә Сәудијјә Әрәбистаны рәсмиләри бу тәләби гаршыламаг мәгсәди илә бу шәһәрләрдә ҝенишләнмә фәалијјәтләри үчүн јени лајиһәләр ахтарышындадыр. С. Әрәбистаны рәсмиләринин бу истигамәтдә атдығы аддымлар исә мүсәлман дүнјасында тәшвишлә гаршыланыр.
Инҝилтәрәдә нәшр олунан “Daily Telegraph” гәзетинин мәлуматына ҝөрә, Мәккәдә Һәзрәти Мәһәммәдин (ә.с.) һәјат јолдашларындан биринин еви үмуми ајагјолу тикинтиси үчүн учурулуб.
Вашингтонда олан “Gulf Institute” (Көрфәз Институту) исә сон 20 илдә Мәккәдә вә Мәдинәдә 1000 иллик биналарын 95 фаизинин учурулдуғуну билдириб.
“Independent” гәзетинин јазычысы Ҹером Тејлор, бу ај Мәдинәдә башладылмасы планлашдырылан ҝенишләнмә лајиһәси сәбәбиндән VII әсрә аид 3 мәсҹидин учурулаҹағыны билдирир.
Тејлор јазыр ки, Ислам пејғәмбәринин гәбринин јерләшдији Мәсҹиди Нәбәви гәрбә доғру ҝенишләндириләҹәк. Бу сәбәблә бу мәсҹидин гәрбиндә олан Ислам хәлифәләри Һәзрәти Әбу Бәкр вә Һәзрәти Өмәрин гәбирләринин олдуғу гисмин көчүрүлмәси мәҹбуридир. Тејлор С. Әрәбистаны рәсмиләринин бу көчүрүлмә барәдә һәр һансы бир ачыглама вермәдијини гејд едир.
Ислам мирасыны арашдырма фондунун рәсмиси Ирфан әл Әллави “Independent” гәзетинә вердији ачыгламада Мәккәнин ҝенишләндирилмәсинә еһтијаҹ олдуғуну, Сәудијјә рәсмиләринин бу истигамәтдә иш ҝөрмәк үчүн сечдији јолун тәшвиш исә јаратдығыны дејиб. “Ҝенишләнмәни тарихи Ислам тикинтиләрини горујараг да һәјата кечирмәк олар. Амма онлар һәр шеји учурмаг истәјир”.
“Telegraph” гәзетинин јазычысы Дамиан Томпсон исә, “Сәудлар Ислам мирасыны јох едир, мүсәлман дүнјасы исә сусур” – јазыр.
Гејд едәк ки, крал Абдуллаһын кечән ил тәсдигләдији Кәбәни ҝенишләтмәк лајиһәси дә мүбаһисәләрә сәбәб олмушду. Бу лајиһәјә ҝөрә, Кәбәнин 770 000 нәфәрин тәваф етдији 356 000 квадратметрлик әразиси 1.2 милјард мөминин тәваф едә биләҹәји 456 000 квадратметрә чатдырылаҹаг. Бу сәбәблә Гануни султан Сүлејманын ҝөстәриши илә Мемар Синанын һазырладығы вә 1590-ҹы илдә Мемар Меһмет Ағанын тикдији Османлы ҝүнбәзләри вә гүббәләри дә учурулаҹаг. Гејд едәк ки, крал Абдуллаһын Мәккәни ҝөјдәләнләр шәһәринә чевирәҹәјинә даир иддиалар вар.
Диггәт: Хәбәрдән истифадә етдикдә мәнбәјә истинад лазымдыр
