Милләт вәкили Гәнирә Пашајева Тәбриздә олуб. О, лент.аз-а билдириб ки, Ҝүнеј Азәрбајҹанда зәлзәләдән зәрәр чәкмиш инсанларла ҝөрүшүб: “Тәбриздәки Баш Консуллуғумузда олдум, онлар да зәлзәләдән зәрәр чәкәнләрә әлләриндән ҝәлән јардымы едирләр. Гардаш-баҹыларымыз Азәрбајҹанын бу ҹүр дујарлылығыны, дәрһал јардым тәклиф етмәсини јүксәк гијмәтләндирирләр. Бу, һамымызын аҹымызды, нә фәрги вар о тај, бу тај”.
Вә… Пашајева дејиб ки, зәлзәлә нәтиҹәсиндә 300 нәфәрин һәјатыны итирмәсинә, 3000-дән артыг јаралы олмасына бахмајараг, Иранын бүтүн әразисиндә матәм елан олунмамасы мәјуслуг јарадыб: ”Садәҹә, Шәрги Азәрбајҹан әјаләриндә матәм елан олунуб. Бу нә мүнасибәтдир, анламырам. Түркијәдә ҝәлән јардым да ҝери гајтарылыб. Бахмајараг ки, һәмин бөлҝәдә инсанларын јардыма ҹидди еһтијаҹлары вар. Амма јардымдан имтина едилиб вә ҝери гајтарылыб”.
Јенә суал јараныр: 20 фаиз торпаглары ишғал олунмуш, ермәни әлиндә гадын әсирләри олан Азәрбајҹан Республикасында матәм елан олунубму? Үмумијјәтлә, ҹәмијјәтдә, милләт вәкилләриндә ишғал әһвал-руһијјәси вармы? Аталар “өз ҝөзүндә тири ҝөрмүр, өзҝә ҝөзүндә чөп ахтарыр” дејәндә билмирди ки, бу сәһвә милләт вәкилләри дә јол верәҹәк. Јохса дејәрдиләр ки, “өз парламенти гыш јухусундадыр, башга парламентләрдә милчәк говур”!
Бу АНС-дән вуруб ММ-дән чыхан ханыма дејән јохдур ки, Гарабағ ермәни тапдығында икән Еуровисион зурнасы үфүрән кичик Азәрбајҹандан фәргли олараг бөјүк Иранда шәһидләр тәкҹә матәм ҝүнләриндә хатырланмыр, онлар бүтүн халг үчүн һәмишәлик символдур. Бакы Ислам мәдәнијјәтинин пајтахты éлан олунду, нә олсун? Бунунла Ислам дәјәрләри ҝүҹләнди, јохса мәсҹидләр учурулду?! Азәрбајҹанда матәм ҝүнләри ресторан-барларда ејш-ишрәт туфан гопардығы һалда Иранда бајрам ҝүнләри дә шәһидләр анылыр.
Бәлкә дә Иран Азәрбајҹанын јардымыны гәбул етмәкдә сәһвә јол вериб. Һамы билир ки, Иран 30 илдән чохдур дүнјанын јохсул мүсәлманларына әл тутур.
Иранын Имам Хомејни Имдад Комитәсинин Азәрбајҹан нүмајәндәлијинин гејдијјатынын ләғв едилмәсини јада салын. 2011-ҹи илин ијун ајында Азәрбајҹанын Әдлијјә Назирлији Иранын Имам Хомејни Имдад Комитәсинин Азәрбајҹан нүмајәндәлијинин гејдијјатыны ләғв етди. Сәбәб нә олду? АПА-нын хәбәринә ҝөрә, гејдијјатын ләғв олунмасына сәбәб кими гурумун һүгуги үнваны вә һүгуги шәхси дәјишиләркән бу барәдә назирлијә мәлумат верилмәмәси ҝөстәрилиб…
Имам Хомејни Имдад Комитәси Бејнәлхалг Һуманитар Тәшкилаты 17 ил иди ки, Азәрбајҹанда рәсми олараг фәалијјәт ҝөстәрирди. Фәалијјәт дөврү әрзиндә һәјата кечирдији һуманитар лајиһәләри Азәрбајҹан Республикасы Назирләр Кабинети илә разылашдырырды. Тәшкилат Азәрбајҹанын бир чох рајон вә гәсәбәләриндә мәскунлашмыш минләрлә гачгын вә мәҹбури көчкүн, шәһид, әлил, јетим, тәнһа, кимсәсиз вә диҝәр азтәминатлы аиләләри һимајәсинә ҝөтүриб. Амма белә бир тәшкилатын гејдијјатында сүни әнҝәл јарадылыр. Иран да әһалиси јохсуллуг ичиндә јашајан Азәрбајҹан һөкумәтинин јардым тәклифини бир тәшәккүрлә рәдд едә биләрди. Онда Гәнирә Пашајева да Тәбриздә пејда олуб Иран һөкумәтинә дәрс кечмәзди.
Бабәк Тәбризли
Диггәт: Хәбәрдән истифадә етдикдә мәнбәјә истинад лазымдыр
