Әһли Бејт -АБНА- хәбәр аҝентлијинин вердији хәбәрә әсасән Омбудсман Елмира Сүлејманованын тапшырығына әсасән Милли Превентив Механизм (МПМ) групу тәрәфиндән Сәһијјә Назирлијинин Нарколожи Мәркәзинин мәҹбури мүалиҹә шөбәсинә, Әдлијјә Назирлији Пенитенсиар Хидмәтин 17 сајлы Ҹәзачәкмә Мүәссисәсинин ҹәримә тәҹридханасына, Бакы Истинтаг Тәҹридханасына вә 3 сајлы Истинтаг Тәҹридханасына тәкрар баш чәкмә һәјата кечирилиб.
Омбудсман Апаратынын мәтбуат хидмәтиндән верилән мәлумата ҝөрә, 17 сајлы ҹәзачәкмә мүәссисәсинин ҹәримә тәҹридханасында сахланылан 18 нәфәр мәһкумла тәкликдә сөһбәт апарылыб, мәһкумларын ҹәримә тәҹридханасында сахланылмасынын ганунилијини тәсдиг едән сәнәдләрлә таныш олунуб. Мәһкумлар рәфтар вә сахланма шәраитиндән шикајәт етмәјибләр.
МПМ Групунун үзвләри Бакы Истинтаг Тәҹридханасында да сахланылан бир нечә тәгсирләндирилән шәхслә ҝөрүшүбләр. Онлар сахланма шәраитиндән шикајәт етмәјибләр. Ејни заманда “Толиши Сәдо” гәзетинин тәсисчиси вә баш редактору Һилал Мәммәдов вә Азәрбајҹан Ислам Партијасынын сабиг сәдр мүавини Меһди Шамилов барәләриндә апарылан истинтагдан наразы олдугларыны билдирибләр.
3 сајлы истинтаг тәҹридханасына бахыш заманы бурада сон бир ајда хејли иш ҝөрүлдүјү мүшаһидә едилиб.
МПМ групунун үзвләри шәраитин даһа да тәкмилләшдирилмәси истигамәтиндә мүәссисә рәһбәрләринә төвсијәләр верибләр. Башчәкмәнин нәтиҹәләри илә бағлы әдлијјә назиринә мүраҹиәт едилиб.
Диггәт: Хәбәрдән истифадә етдикдә мәнбәјә истинад лазымдыр
