Әһли Бејт -АБНА- хәбәр аҝентлијинин вердији хәбәрә әсасән Иҹтимаи Палата ијунун 9-да нөвбәти сессијасыны кечирди. Сессијанын ишинә Иҹтимаи Палатанын Координасија Шурасынын үзвү Видади Миркамал рәһбәрлик едирди.
Палата өз ишинә дөвләт һиминин ифасы вә ҹәбһә хәттиндә шәһид олан һәрбичиләримизин хатирәсинә сајғы дурушу илә башлады.
Ҝүндәлијә иҹтимаи сијаси вәзијјәтин, о ҹүмләдән ҹәбһә хәттиндә баш верәнләрин вә нөвбәти дөвр үчүн Палатанын гаршысында дуран вәзифәләрин мүзакирәси дахил едилди.
Мүзакирәләрдән әввәл өтән дөврдә гурумун ишинә сәдрлик едән Координасија Шурасынын үзвү Раһим Һҹыјевин һесабаты динләнилди.
Ҝүндәликдә дуран мәсәлә илә бағлы Видади Миркамал илк чыхышчы олду. О өтән мүддәтдә ИП-ин фәалијјәтини јүксәк дәјәрләндирди. Гејд етди ки, өтән мүддәтдә әлдә едилән уғурлара бахмајараг, ИП башлыҹа һәдәфинә һәлә јетмәјиб. Бунун да әсас сәбәби тәшкилатланма ишинин јетәринҹә олмамасыдыр.
Верилән мәлумата ҝөрә ИП һазырда 50 рајонда дајағыны јарадыб, даһа 20 рајонда исә тәшкилатланма иши ҝедир.
Тәшкилатланма иши вә просесләрә ҝениш халг күтләләринин ҹәлб олыунмасы илә бағлы мәгамлар әксәр натигләрин чыхышнда әсас мәгам кими вурғуланды.
Мүсават башганы Иса Гәмбәр диггәти “Еуровисон” ҝүнләриндә һакимијјәтин јашадығы ағыр дурума ҹәлб етди. Дүнјада һәр ҝүн Азәрбајҹандакы авторитар режимин ифша олунмасыны тәгдирәлајиг һал кими дәјәрләндирән Иса Гәмбәр дә дәјишиклик үчүн әсас факторун өлкә дахилиндә олдуғуну вурғулады.
Координасија Шурасынын үзвү Пәнаһ Һүсејн исә 2013-ҹү ил сечкиләринә аз галдығы барәдә чыхыш едәрәк Иҹтимаи Палата үзвләрини мүхалифәтин ваһид намизәди вә үмумијјәтлә сечки старатеҝијасы барәдә ләнҝ һәрәкәт етмәкдә тәнгид етди.
ИП үзвү Самир Әсәдли ҝәнҹләрә һүгуг-мүһафизә органларынын ҝүҹләнән тәзјигләриндән сөз ачды вә ИП-ин бу барәдә сәрт мөвге ҝөстәрмәсини тәклиф етди.
ИП үзвү Әрәстун Оруҹлу исә чыхышында һакимијјәтин паника ичиндә олдуғуну деди. О, сон вахтлар һакимијјәтин мүхалифәтә вә дүнјанын ҝүҹлү дөвләтләринә гаршы күчә давранышы ҝөстәрмәсини тәнгид едәрәк билдирди ки, бу даһа чох Әлијев һакимијјәтинин сонунун ҝәлдијини дәрк етмәси илә бағлыдыр.
АХҸП сәдри Әли Кәримли чыхышында өтән мәрһәләјә гијмәт верди. О, “Еуровисон” әрәфәсиндә истәр разылашдырылмыш, истәр дә разылашдырылмамыш аксијаларын дүзҝүн тактика илә кечирилдијини вурғулады, бу ишдә әмәји кечәнләрә тәшәккүр етди.
Әли Кәримли билдирди ки, “Еуровисон” әрәфәсиндә кечирилән аксијаларла ИП Азәрбајҹан халгынын демократијаја һазыр олдуғуну, дәјишиклик истәдијини сүбут едиб, бунунла да Азәрбајҹанын вә топлумун имиҹини јүксәлдиб.
Бејнәлхалг тәшкилатларын узун илләрдән сонра Азәрбајҹанла бағлы дәгиг вә адекват мөвге сәрҝиләдијини дејән Әли Кәримли билдирди ки, онларын реаксијаларынын үрәк истәјән формада олмасы үчүн үрәкдән кечән аксијалар тәшкил етмәк, мүбаризә апарамаг лазымдыр.
Тәмас хәттиндә баш верәнләрдән нараһатлығыны диггәтә чатдыран АХҸП сәдри Азәрбајҹан һакимијјәтинин бу һадисәләрдә сәмими мөвге тутдуғуна шүбһә етдијини дилә ҝәтирди. О, деди ки, торпагларын азадлығы, ишғалдан гуртармасы онлар үчүн мүһум мәсәләдир вә Азәрбајҹан әсҝәри анҹаг бу мәгсәдлә шәһид олмалыдыр, даһа һансыса ојунун гурбаны кими јох.
Ваһид намизәд барәдә дә мөвгејини билдирән АХҸП сәдри деди ки, бу ҝүн әсас диггәт вә һәдәф киминсә һакимијјәтә ҝәлмәси үчүн јох, Әлијевчи режимин ҝетмәси үчүн сәфәрбәр олмалыдыр.
Сессија сонда ҝәнҹләрә јөнәлән тәзјиг вә ҹәбһә хәттиндә баш верәнләрлә бағлы бәјанатлар гәбул етди.
Диггәт: Хәбәрдән истифадә етдикдә мәнбәјә истинад лазымдыр
