Әһли Бејт -АБНА- хәбәр аҝентлијинин вердији хәбәрә әсасән Иран Ислам Республикасынын Хариҹи Ишләр Назири Әли Әкбәр Салеһи базар ҝүнү кечирдији мәтбуат конфрансында билдириб:”Иран Ислам Республикасы Дағлыг Гарабағ мүнагишәсинин һәлли үчүн Азәрбајҹанла Ермәнистан арасында васитәчилик етмәјә һазырдыр”.
Салеһи билдириб ки, ИИР-ы Дағлыг Гарабағ мүнагишәсинин сүлһ јолу илә һәллини истәјир.
"Ҹәнуби Гафгаз реҝионунда марагларымыз вар, вә буна ҝөрә реҝионда сүлһүн олмасыны истәјирик"- дејә Салеһи билдириб.
Ики Ҹәнуби Гафгаз өлкәси арасында мүнагишә 1988-ҹи илдә Ермәнистанын Азәрбајҹана гаршы әрази иддиасы ирәли сүрмәси зәмининдә јараныб. Азәрбајҹан торпагларынын ијирми фаизи, јәни Дағлыг Гарабағ әразиси вә бу әразијә битишик једди рајон ишғалчы Ермәнистан Силаһлы Гүввәләринин ишғалы алтындадыр. 1994-ҹү илдә тәрәфләр атәшкәс режиминә даир разылашма әлдә едибләр вә о вахтдан бәри АТӘТ-ин Минск групунун һимајәси алтында, Русија, Франса вә АБШ-ын һәмсәдрлији илә һәлә дә нәтиҹәсиз сүлһ данышыглары апарылыр.
БМТ Тәһлүкәсизлик Шурасынын Дағлыг Гарабағ вә әтраф рајонларын азад едилмәсинә даир гәбул етдији дөрд гәтнамәни Ермәнистан бу ҝүнә гәдәр јеринә јетирмәјиб.
Диггәт: Хәбәрдән истифадә етдикдә мәнбәјә истинад лазымдыр
