Әһли Бејт -АБНА- хәбәр аҝентлијинин вердији хәбәрә әсасән: Азәрбајҹан Бејнәлхалг Университетинин бағланмасындан сонра Тәһсил Назирлији бу вә диҝәр али мәктәбләрдән сахта јолла алынмыш дипломларла бағлы арашдырмалара башлады. Назирлијин тәфтиши заманы һазырда орта мәктәбләрдә 300-дән артыг мүәллимин дипломла ишләдији үзә чыхмышды. Өтән илин нојабр ајында назирлик бунунла бағлы рәсми ачыглама јајды вә һәмин педагоглар тутдуглары вәзифәдән азад едилдиләр. Тәһсил Назирлији арашдырмаларын давам етдириләҹәјини дә елан етмишди.
Лакин инди ортаја фәргли бир мәнзәрә чыхыб. Белә ки, дипломларынын сахта һесаб едилмәси илә бағлы ишдән узаглашдырылан вә бунунла әлагәдар Ҹәлилабад Рајон Мәһкәмәсинә мүраҹиәт едән мүәллимләрин бөјүк бир гисми ишләринә бәрпа олунуб. Мәлуматы тәсдиг едән Ҹәлилабад Рајон Мәһкәмәсиндән АПА-ја билдирилиб ки, 76 шикајәт үзрә мәһкәмә ишинә хитам верилиб: “Онлар ишдән чыхарылмалары илә бағлы мәһкәмәјә мүраҹиәт едибләр. Һәмин шәхсләрин ишә бәрпасы илә бағлы рајон тәһсил шөбәси вә мәктәб директорлары арасында разылашмалар олуб, барышыг сазиши имзаланыб, мәһкәмә бу сазишә әсасән ишләрин һамысына хитам вериб”.
Мәлумата ҝөрә, 76 шикајәт үзрә мәһкәмәјә мүраҹиәт едән тәһсил ишчиләринин бир гисми әввәлләр Нефтчалада фәалијјәт ҝөстәрән Гызлар Коллеҹинин 1992-93-ҹү тәдрис илләри үзрә мәзунлары, фәалијјәти дајандырылан диҝәр техникум вә коллеҹләрин мәзунлары олуб. Онлар охудуглары тәһсил мүәссисәләринин Тәһсил Назирлији тәрәфиндән гејдијјатда олмасы илә бағлы сәнәдләр тәгдим едибләр.
Тәһсил Назирлијинин мәтбуат хидмәтинин рәһбәри Бајрам Һүсејнзадә АПА-ја билдириб ки, назирлик ганунларын алилијини үстүн тутур: “Азәрбајҹанын һәр һансы бир рајонунда ишдән узаглашдырылан тәһсил ишчиләри мәһкәмәјә мүраҹиәт едибсә вә өз ишләринә мәһкәмә гәрары илә бәрпа олунубса, биз бунунла разыјыг вә бу гәрарлара һөрмәтлә јанашырыг”.
Әлдә етдијимиз мәлумата ҝөрә, сахта дипломларла бағлы һүгуг-мүһафизә органларында да арашдырмалар ҝедир. Белә ки, диплому сахта елан едилән мүәллимләр Коррупсијаја Гаршы Мүбаризә Идарәсинә дәвәт едилир вә онлардан али тәһсил һаггында сәнәди неҹә әлдә етдикләри сорушулур. Даһа сонра исә дипломлары сатан мәнбәләрин изинә дүшүлүр. Бизи мәлуматландыран мәнбә гејд етди ки, һазырда дөвләт идарәләриндә чалышан минләрлә сахта диплом алмыш шәхсләр вар вә онларын әксәри вәзифәли адамлар вә ја онларын јахынларыдыр: “Суал олунур, сахта дипломла чалышанлар тәкҹә мүәллимләрдир? Башга саһәдә чалышанлар арасында сахта диплом алан јохдур? Әлбәттә вар вә һазырда онлары арашдырмаг һакимијјәтдәки мараглы шәхсләрә сәрф етмир. Јалныз мүәллимләрин дипломларынын тәфтиш едилмәси һансыса бир марагдан доғурду вә бу мүәјјән груплашмалар арасында ҝедән чәкишмәнин тәзаһүрү иди. Инди исә дипломлары сахта елан едиләнләр күтләви шәкилдә мәһкәмәләрә мүраҹиәт едирләр. Артыг һәмин дипломларын етибарлы олмасына даир преседент јараныб вә һеч шүбһәсиз ки, сахта елан едилән дипломларын әксәри мәһкәмәләр тәрәфиндән танынаҹаг”.
Мәнбәмиз деди ки, сахта диплом верилмәси иши илә мәшғул олан бөјүк бир мафија вар вә онунла мүбаризә апармаг Мисир Мәрдановун тәкбашына баҹараҹағы иш дејил: “Әлбәттә, сахта елан едилән бәзи дипломлар вахтилә мәһз елә Тәһсил Назирлијиндәки мүәјјән чеврәләрин дә иштиракы илә сатылыб. Лакин бурада башга групларын да мараглары вар. Она ҝөрә дә бу мәсәләдә икитирәлик јараныб. Даһа доғрусу, сахта диплом ”ишинә" бахан груплашма өз ҝүҹүнү ҝөстәрир. Бундан башга, наразылыгларын ҝүнбәҝүн артдығы бир әрәфәдә сахта дипломла ишләјән тәбәгәни ајаға галдырмаг да һакимијјәтин сијасәтинә ујғун дејил. Она ҝөрә дә сахта али тәһсил һаггында сәнәдләрин тәфтиши фәргли мәҹраја јөнәлдилир".
Тофиг ӘҺМӘДЛИ
Диггәт: Хәбәрдән истифадә етдикдә мәнбәјә истинад лазымдыр
