Мөвсүм Сәмәдов олдугҹа ләјагәтли бир инсандыр. Сөзүн дүзүнү дејән, Аллаһ адамыдыр. Әслиндә, демократијанын әсас атрибутларындан бири, сөз азадлығыдыр. Әсл зијалы Аллаһдан, халгдан вә дөвләтчиликдән башга һәр шејә мүхалиф оландыр. Бу фикирләри SalamNews-а мүсаһибәсиндә Азәрбајҹан Зијалылары Һәрәкатынын сәдри Елдәниз Гулијев дејиб.
- Азәрбајҹан Ислам Партијасынын (АИП) сәдри Мөвсүм Сәмәдовун һәбсиндән бир ил өтдү. Бу һагда нә дејә биләрсиниз?
- Мән тәәссүфлә гејд етмәк истәјирәм ки, Азәрбајҹанда шәхсијјәтли инсанлар, әдаләтли сөз демәк игтидарында олан шәхсләр, дүз данышан, һаггы дејән инсанлар нәдәнсә сон заманлар тәгибә мәруз галырлар. Бу аҹы һисс доғурур. Бәзи зијалыларымыз вар ки, онлар халгын ағрысыны, дәрдләрини “су чәкән” кими өзләринә һопдурублар.
Мөвсүм Сәмәдов олдугҹа ләјагәтли бир инсандыр. Сөзүн дүзүнү дејән, Аллаһ адамыдыр. Бәзән дејирләр ки, зијалы кимдир? Дүз данышан, һаггы, әдаләти дејән инсан мүхалифдирми? Бәли, мүхалифдир. Лакин биз баша дүшдүјүмүз әнәнәви мүхалиф јох. Әсл зијалы Аллаһдан, халгдан вә дөвләтчиликдән башга һәр шејә мүхалифдир, о ҹүмләдән мүхалифәтин өзүнә дә мүхалифдир. Достум, гардашым Мөвсүм Сәмәдов мәһз бу ҹүр инсандыр. Әминәм ки, о, халгыны, дөвләтини вә дөвләтчилијини, Азәрбајҹан мәнәвијатыны о гәдәр севирди ки, ону шәхси мәнафедән һәр ан үстүн тутурду.
- Бу сијасәт дүзҝүндүрмү вә бунун фәсадлары ола биләрми?
- Азәрбајҹанда чох бөјүк сәһв сијасәт јүрүдүлүр. Бу нәдән ибарәтдир? Бу ондан ибарәтдир ки, чох заман дөвләтчилијимизи дөвләт башчысы илә бәрабәрләшдиририк. Бу, фәсадлар төрәдир, о ҹүмләдән сосиал әдаләтсизлик јарадыр. Һәр-һансы мәмура дејирләрсә, ҝет бир папаг ҝәтир, ҝедиб баш ҝәтирир. Бујуруг гулуна чеврилирләр. Сосиал әдаләтсизлик, һәр јердә, һәр шејдә екстремал шәраит јарадыр вә сонда һәмин екстримал вәзијјәт екстримизм јарадыр. Бундан горхмаг лазымдыр. Дөвләтчилик әбәдидир, лакин дөвләт башчысы әбәди ола билмәз. Әслиндә, демократијанын әсас атрибутларындан бири, сөз азадлығыдыр. Елә һәмин достларымыз “сөзә” ҝөрә азад олдулар. Бу, ејни заманда Азәрбајҹан демократијасына вурулан зәрбә олду. Бу, парадоксдур.
Конфутсинин белә бир сөзү вар: “Мәһкәмәләрин рүшвәтлә ишләмәси онун сифаришлә ишләмәсиндән јахшыдыр”. Фикир верин, сон дөврләрдә нәгәдәр сифаришли һәбсләр олуб. Һәбс олунан гардашларымыз нә истәјирдиләр? Онлар халгын мәнәвијатынын тәмизлијини, әхлаглы олмасыны, мәдәни етик давраныш гајдаларына риајәт етмәсини истәјирдиләр. Ејни заманда, бу инсанлар Илаһинин бујурдугларынын јеринә јетирмәк истәјирдиләр.
- Үмумијјәтлә, бунунла бағлы чыхыш јолуну нәдә ҝөрүрсүнүз?
- Әслиндә, бу һәбсләр бәзи мәмурлар тәрәфиндән дәлинин гујуја даш атма феноменини јаратды. Кимсә гујуја даш атды, инди ону чыхармаг мүмкүн дејил. Һесаб едирәм ки, биз дүз сөзү демәлијик, достларымызы ахыра гәдәр мүдафиә етмәлијик. Чүнки онлар һаглы идиләр, онлар һәгигәти дејирдиләр.
Белә бир фикир вар ки, “дүз дајанмысанса көлҝәнин әјри дајанмағындан горхма”. Биз дүз дајанмышыг, биз дүз сөзү дејирик. О, дүз сөзү дејиб, һаггы, әдаләти истәјән гардашларымызын мүдафиәсиндә һәр ан варыг. Башга алтернатив јохдур. Аллаһ Тәаланын сөзү вар ки, әдаләтсизлијә гаршы, зүлмә, зүлмкара гаршы мүбаризә апармајанын инсанын јери ҹәһәннәмдир. Мәһз буну әсас ҝөтүрмәлијик.
Диггәт: Хәбәрдән истифадә етдикдә мәнбәјә истинад лазымдыр
