Әһли Бејт -АБНА- хәбәр аҝентлијинин вердији хәбәрә әсасән: Иран Ислам Республикасынын президенти Маһмуд Әһмәдинежад БМТ Баш Ассамблејасынын 66-ҹы сессијасында чыхыш едиб. Чыхышына дүнјанын мүхтәлиф јерләриндә јајылан инфексион хәстәликләрдән өлән инсанларын јахынларына баш сағлығы верәрәк башлајан Әһмәдинежад, инсанларын диҝәр варлыглардан үстүн олдуғуну сөјләјиб. Инсанларын буҝүнкү сосиал вәзијјәтинин Ислам Пејғәмбәринин (с) ҝәтирдији илаһи месажа ујғун ҝәлмәдијини дејән Иран лидери, Пејғәмбәрин (с) месажынын материалист дәјәрләрлә дәјишдирилдијини сөјләјиб. Әһмәдинежад дүнјадакы әдаләтсизликдән данышаркән гејд едиб ки, Јер күрәсинин 40 фаиз сәрвәти 5 фаиз әһали арасында бөлүшдүрүлүр, 20 фаиз сәрвәти исә 75 фаиз әһали арасында бөлүшдүрүлүр.
Мүстәмләкәчилик вә көләлији, Икинҹи Дүнја Мүһарибәсини, Кореја вә Вјетнам мүһарибәләрини кимләрин башлатдығыны, тоталитар һәрби режимләри кимләрин дәстәкләдијини, атом бомбасыны тарихдә илк дәфә кимин истифадә етдијини, Ирагын Ирана һүҹумуну вә 8 ил давам едән мүһарибәни кимин дәстәкләдијини иҹласдакылардан сорушан Әһмәдинежад АБШ вә мүттәфигләрини тәнгид едиб. О, АБШ вә мүттәфигләрини бүтүн дүнјада мүһарибәләр салмагда, наркотик тиҹарәтиндә, күтләви гәтлләрдә, башга халглары әсарәт алтына алмагда, еләҹә дә малијјә бөһраныны тәшкил етмәкдә ҝүнаһландырыб.
Әһмәдинежад чыхышы заманы Нју-Јорк шәһәриндә 2001-ҹи илдә баш вермиш мәлум террор актларына тохунуб. О, бу һүҹумларын Ираг вә Әфганыстанын ишғалы үчүн бәһанә олдуғуну билдириб.
Маһмуд Әһмәдинежадын сөзләринә ҝөрә, өзүндән разы Гәрб фөвгәлдөвләтләри Һолокосту вә АБШ-а 11 сентјабр һүҹумларыны инкар едәнләрин һамысыны тәһдид едирләр. Иран президенти бир даһа бәјан едиб ки, Һолокост 60 илдир сионизмә бәраәт газандырылмасына хидмәт едир.
Чыхышынын сонунда Әһмәдинежад јахын заманларда мүсәлманларын 12-ҹи Имамы Һәзрәт Меһди (ә.ф) илә Иса пејғәмбәрин (ә) зүһур едәҹәјини вә дүнјаны әдаләтсизликдән хилас едәҹәјини дејиб.
Диггәт: Хәбәрдән истифадә етдикдә мәнбәјә истинад лазымдыр
