Әһли Бејт -АБНА- хәбәр аҝентлијинин вердији хәбәрә әсасән: Абҝүл Сүлејмановун шикајәтинә һаким Мирзәли Аббасов, Ариф Гәнијевин шикајәтинә ишә һаким Саһибхан Мирзәјев бахыб.
Һәр ики шәхсин һүгугларыны мүдафиә едән вәкил Анар Гасымлы дејиб ки, нарколожи експертиза мүвәккилләри барәдә рәјини ачыглајыб: “Рәјдә јазылыб ки, Абҝүл Сүлејманов вә Ариф Гәнијев наркотик маддәләрдән әзијјәт чәкмирләр”.
Анар Гасымлы ону да гејд едиб ки, Баш Прокурорлугла һәр ики шәхсин сахланма јери вә истинтагынын апарылмасы илә бағлы јазышманын сон ҹавабы да бәлли олуб: “Баш Прокурорлуг гәрар вериб ки, Милли Тәһлүкәсизлик Назирлији бу ишләрин истинтагыны давам етдирә биләр”.
Абҝүл Сүлејманов Ҹинајәт Мәҹәлләсинин 234.1, Ариф Гәнијев Ҹинајәт Мәҹәлләсинин 228.1 вә 234.1-ҹи маддәләри илә МТН нүмајәндәләри тәрәфиндән шәрләнәрәк иттиһам олунур. МТН-ин Иҹтимаи Әлагәләр Мәркәзинин августун 12-дә јајдығы мәлумата ҝөрә, онлар Азәрбајҹан вәтәндашы Бајрамов Рамин Ҹаһанҝир оғлу илә бирҝә сахланыблар: “Мүәјјән едилиб ки, Абҝүл Сүлејманов Иран Ислам Республикасынын Бакыда фәалијјәт ҝөстәрән Мәдәнијјәт Мәркәзинин малијјә дәстәји әсасында рәсми дөвләт гејдијјаты олмајан “Ҹәфәри” адлы радикал дини груп јарадараг она рәһбәрлик едиб.
Групун үзвләри дини радикаллығы тәшвиг едән тәблиғатлар апарыб, һәмчинин белә ифрат чағырышлары, еләҹә дә дини тәфригәни, мәзһәб ајры-сечкилијини ашылајан вәрәгәләрин һазырланмасыны вә диндарлар арасында пајланылмасыны тәшкил едибләр. “Ҹәфәри” адлы радикал дини груп тәрәфиндән тәблиғат ишинин ҝенишләндирилмәси мәгсәдилә “Ислам-Азери.аз” интернет сајты јарадылыб вә она рәһбәрлик Рамин Бајрамова һәвалә олунуб.
Абҝүл Сүлејманов вә “Ҹәфәри” адлы дини радикал групун үзвләри Иран Ислам Республикасынын Бакыдакы Мәдәнијјәт Мәркәзинин әмәкдашлары, еләҹә дә Азәрбајҹанда фәалијјәт ҝөстәрән радикал шиәмејилли дини иҹма вә бирликләр, о ҹүмләдән онларын рәһбәрләри илә сых әлагәләр сахлајыблар.
Бундан башга, Абҝүл Сүлејманов һазырда Ҹинајәт Мәҹәлләсинин террорчулуг вә дөвләтә хәјанәт маддәләри илә 2008-ҹи илдән барәсиндә бејнәлхалг ахтарыш елан олунмуш Азәрбајҹан вәтәндашы, Иранын Гум шәһәриндә јашајан вә орада фәалијјәт ҝөстәрән “Һагг јолу” елми-мәдәни мүәссисәсинин рәһбәри Һүсејнов Исҝәндәр Һүсејнәли оғлу илә јахын мүнасибәтләр сахламагла јанашы “Ҹәфәри” адлы дини радикал групун фәалијјәт истигамәтини мүәјјәнләшдирмәкдә сонунҹудан мүтәмади тәлиматлар алыб.
“Ҹәфәри” адлы радикал дини групун үзвләри Иранын Азәрбајҹанда фәалијјәт ҝөстәрән дини нүмајәндәликләри тәрәфиндән малијјәләшдирилән вә рәсми дөвләт гејдијјаты олмајан Азәрбајҹан Ислам Партијасынын тәдбирләриндә даим иштирак едәрәк ачыг шәкилдә Азәрбајҹанда шәриәт ганунлары илә идарә олунан дөвләтин јарадылмасына чағырышлар едибләр.
Кечирилмиш бахышлар нәтиҹәсиндә ҝүја МТН нүмајәндәләри Ариф Гәнијевин үзәриндән тәхминән 19 грам наркотик васитә олан һәшыш вә она мәхсус автомобилдән 1 әдәд “Макаров” типли тапанҹа, һәмин одлу силаһа аид 1 әдәд тапанча дарағы, 5 әдәд “ПМ” патрону (мәрми, ҝүллә), Рамин Бајрамова мәхсус гараждан 1 әдәд “Бајкал” типли тапанча, һәмин тапанчаја аид сәсбоғуҹу, 1 әдәд тапанча дарағы, 8 әдәд патрон, 2 әдәд “Ф-1” типли әл гумбарасы вә 2 әдәд алышдырыҹы, 13 грамдан артыг наркотик васитә олан һәшиш гәтраны, Абҝүл Сүлејмановун үзәриндән 23,7 грам наркотик васитә олан һәшиш ашкар едиләрәк ҝөтүрүлүб.
Фактла бағлы МТН-ин Истинтаг Баш Идарәси тәрәфиндән Ҹинајәт Мәҹәлләсинин 228.1 (ганунсуз олараг одлу силаһ, дөјүш сурсаты сахлама, дашыма вә ҝәздирмә) вә 234-ҹү (ганунсуз олараг наркотик васитәләри әлдә етмә, сахлама, дашыма) маддәләри илә шәрләнәрәк ҹинајәт иши башланылыб. Сүлејманов Абҝүл Немәт оғлу, Бајрамов Рамин Ҹаһанҝир оғлу вә Гәнијев Ариф Ҝүлсувар оғлу шәрләнәрәк тәгсирләндирилән шәхс гисминдә ҹәлб олунараг барәләриндә мәһкәмәнин гәрары әсасында һәбс гәтимкан тәдбири сечилиб”.
Диггәт: Хәбәрдән истифадә етдикдә мәнбәјә истинад лазымдыр
