Әһли Бејт -АБНА- хәбәр аҝентлијинин вердији хәбәрә әсасән:
Анар Гасымлы Мөвсүм Сәмәдовун вә диҝәр һәбс олунан шәхсләрин вәкилләр илә һеч бир проблеминин олмадығыны гејд едәрәк, мәһкәмәнин гәрәзли вә сифаршли олдуғуна ҝөрә, нә вәкилләринин, нә дә ки, өзләринин мәһкәмәдә иштирак етмәк истәмәдикләрини билдирди.“Һәбс олунан шәхсләрин вәкилләрлә һеч бир проблеми јохдур. Әслиндә бу мәсәлә мәһкәмәнин ганунсуз, әдаләтсиз вә гәрәзли олмасы илә бағлы бир мәсәләдир. Бу ҝүн мәһкәмә иҹласы башлајан кими мән вәсатәтләр тәгдим етдим ки, видео чәкилишә иҹазә верилсин. Һаким бу вәсатәти тәмин етмәди ки, бу мәсәләјә кечән дәфә бахмышыг. Биз бу вәсатәтин әвәзиндә алтернатив бир вәсатәт тәгдим етдик ки, аудио чәкилишә иҹазә верилсин. Биз иҹласларда садәҹә олараг хырда бир диктатафон ҝәтирәрәк просеси сәсә јазмаг истәдијимизи билдирдик. Бу вәсатәтимиз дә тәмин олунмады. Бундан сонра тәгсирләндирилән шәхсләр мәһкәмәјә етираз етдиләр ки, сиз гәрәзлисиз вә сифариш јеринә јетирирсиз. Һәтта ади бир вәсатәти белә тәмин еләмирсиз. Она ҝөрә дә сиздән һәр һансы бир әдаләтли гәрар ҝөзләмирик. Етираз јазылы формада һакимләрә тәгдим олунду. Һазырда етираз бахылмамыш сахланылыб. Сонра Мөвсүм Сәмәдов чыхыш едәрәк бир даһа етиразыны билдирди ки, мәһкәмәнин гәрары артыг индидән ајдындыр. Сиз мәһкәмәни бир шоуја чевирмисиниз. Онсуз да сиз истәдијиниз гәрары гәбул едәҹәксиз. Вәкилләримиз нә вәсатәт верир тәмин еләмирсиз. Буна ҝөрә дә нә мән өзүм бурада иштирак еләмәк истәјирәм, нә дә ки, вәкилимин иштиракыны истәјирәм.
Мөвсүм Сәмәдов вә диҝәр һәбс олунанлар конкрет олараг вәкилләрдән имтина етмәјибләр. Садәҹә олараг јаздыглары етираз әризәсиндә билдирибләр ки, дүнјанын ән танынмыш вә савадлы пешакар вәкили дә ҝәлсә мәним һүгугларымы мүдафиә едә билмәјәҹәк. Она ҝөрә ки, сиз сијаси сифариш һәјата кечирдирсиниз. Мәним вәкилләрдән имтина етмәјим нә вәкиллә, нә дә ки, мәним мадди вәзијјәтимлә бағлыдыр. Мәнә дөвләт һесабына да вәкил лазым дејил. Артыг бундан сонра һеч мән өзүм дә мәһкәмәјә ҝәлмәк истәмирәм. Сизә һансы сифариши вә гәрары верибләрсә ону да бизим иштиракымыз олмадан чыхардын. Биз бурада иштирак етмәклә әслиндә сизин ганунсузлугларыныза һүгуги дон ҝејиндиририк ки, ҝуја сиз бурада бизи һүгуги формада мүһакимә едирсиниз. Биз сизин аләтинизә чеврилмәк истәмирик. Мөвсүм Сәмәдов әризәсинин сонунда шәрт гојду ки, әҝәр сиз бизим ән елементар һүгугумузу тәмин едиб мәһкәмә иҹласында видео чәкилиш апармаға иҹазә версәниз мән о заман вәкилим Анар Гасымлы илә јенидән мүгавилә имзалајаҹам вә јенидән онун иштиракы илә мәһкәмәјә ҝәләҹәм.
Һәмчинин Анар Гасымлы деди ки, “Ганунвериҹилијә ујғун олараг тәгсирләндирилән шәхси һеч ким мәһкәмәдә иштирак етмәјә мәҹбур едә билмәз. Һәбс олунан шәхс мәһкәмәјә ҝәлмәкдән имтина едә биләр.”
Диггәт: Хәбәрдән истифадә етдикдә мәнбәјә истинад лазымдыр
