Әһли Бејт -АБНА- хәбәр аҝентлијинин вердији хәбәрә әсасән: Иран Ислам Республикасы Хариҹи Ишләр Назирлијинин сөзчүсү Рамин Меһманпәрәст ијулун 5-дә журналистләрә ачыгламасында 3 ијулда Иран-Азәрбајҹан сәрһәдиндә баш верән олајдан данышыб.
Меһманпәрәст һадисә һагда белә дејиб: “Иран Ислам Республикасы илә Азәрбајҹан Республикасынын гоншу олдуғуну нәзәрә алараг адәтән сәрһәддә мүхтәлиф проблемләр ортаја чыхыр. Һесаб едирәм ки, надир сәрһәд һадисәләри Иранла Азәрбајҹан арасындакы гаршылыглы мүнасибәтләрә тәсир етмәмәлидир. Бизә ҝәлән мәлуматлара ҝөрә, Азәрбајҹан Республикасынын бир сыра сәрһәдчиләринин Иран әразисинә дахил олмасына ҝөрә сәрһәддә мәһдуд гаршыдурма јараныб. Белә һалларда һәр ики өлкәнин мүвафиг рәсмиләри мәсәләни арашдырмалы, проблемин һәллинә чалышмалыдыр”.
Гејд едәк ки, Азәрбајҹан Дөвләт Сәрһәд Хидмәтинин јајымладығы мәлуматда исә һадисәнин шәрһи бәлә верилир: “Ијулун 3-дә Иран Ислам Республикасындан кечән силаһлы шәхсләр Јардымлы рајонунун Арвана кәнди јахынлығында јерләшән сәрһәд заставасынын хидмәти әразисиндә сәрһәди позуб. Сәрһәд нарјадына гаршы силаһ тәтбиг едилиб вә нарјадын башчысы лејтенант Рүфәт Гулијев һәлак олуб. Силаһлы шәхсләр Иран Ислам Республикасына гачыблар”.
Диггәт: Хәбәрдән истифадә етдикдә мәнбәјә истинад лазымдыр
