Әһли Бејт -АБНА- хәбәр аҝентлијинин вердији хәбәрә әсасән: Мајын 16-да Бакыда, “Тәзәпир” мәсҹидиндә Гафгаз Халглары Али Сарај Дини Шурасынын һесабат топлантысы кечирилиб. Шуранын сәдри Аллаһшүкүр Пашазадә һесабат мәрузәси илә чыхыш едиб. О, дини конфессијалар арасында диалога һәлә дә еһтијаҹ олдуғуну вурғулајыб. Аллаһшүкүр Пашазадә гејд едиб ки, Гафгаз Халглары Али Дини Шурасы милли, дини, мәзһәб ајры-сечкиликләрини арадан галдырмаг вә динләрарасы әлагәләри ҝүҹләндирмәк истигамәтиндә фәалијјәт ҝөстәрир: “2010-ҹу илин апрелиндә Бакыда дүнја дини лидерләринин топлантысынын кечирилмәси бу әлагәләрин хүсуси мәрһәләјә гәдәм гојмасындан хәбәр верир”.
Чеченистан мүфтиси белә тәдбирләрин данышмаг үчүн јох, проблемләрин арадан галдырылмасы үчүн кечирилдијини дејиб. Дини рәһбәрләри өз ишләринә ҹидди јанашмаға чағыран мүфти бәзән проблемләрин ишә сәһләнкар мүнасибәтдән гајнагландығыны вурғулајыб. Шимали Гафгазда дини зәминдә радикаллығын азалдығыны дејән мүфти бу амилин там сырадан чыхмасы үчүн ҝәнҹләрлә ишләмәјин ваҹиб олдуғуну билдириб вә бүтүн конфессија рәһбәрләрини бу саһәдә бирҝә фәалијјәтә чағырыб.
Краснодарын дини рәһбәри христиан ҝәнҹләрин мәсҹидләрдән, мүсәлман ҝәнҹләрин исә килсәләрдән хәбәрсиз олмаларына диггәт чәкиб вә дини лидерләри бу ҹүр психоложи манеәләри арадан галдырмаға чағырыб. О, әрәб өлкәләриндә баш верән ингилаблары писләјиб вә дејиб ки, белә һалларын Азәрбајҹан вә Русијада тәкрарланмасынын гаршысыны алмаг лазымдыр. Православ килсәсинин Хәзәрјаны өлкәләр үзрә рәһбәрлији дә Краснодар мүфтиси илә һәмрәј олдуғуну билдириб.
“Туран”ын мәлуматына ҝөрә, сонда дини лидерләр гәтнамә гәбул едибләр. Гәтнамәдә сијасәтин вә динин ајры-ајрылыгда фәалијјәт ҝөстәрмәси, анҹаг һәр икисинин сүлһә, инсанларын јашамаг һаггына, рифаһа хидмәт етмәси вурғуланыб. Сәнәддә о да гејд олунуб ки, әрәб дүнјасында баш верән гаршыдурмалар дүнја мүһарибәсинә сәбәб ола биләр вә буна ҝөрә дә дөвләтләрин дахили ишләринә мүдахилә јолверилмәздир.
Диггәт: Хәбәрдән истифадә етдикдә мәнбәјә истинад лазымдыр
