Әһли Бејт -АБНА- хәбәр аҝентлијинин вердији хәбәрә әсасән: Иран Ислам Республикасынын Азәрбајҹандакы сәфири Мәһәммәдбағыр Бәһрами мәтбуат конфрансы кечириб.
ИИР-нын Урмија шәһәриндә Түркијә, Азәрбајҹан вә Иран хариҹи ишләр назирләринин өтән һәфтә кечирилән ҝөрүшүнә диггәт чәкән М. Бәһрами дејиб ки, бу 3 өлкә стратежи тәрәфдашдыр вә ҝөзәл мүнасибәтләрә маликдир: “Бу өлкәләрин бирлији реҝион вә дүнја үчүн мүһүм рол ојнаја биләр. Ҝөрүшдә гәбул олунан бәјаннамә өлкәләрин инкишафына тәсир етмәклә јанашы, сијаси әһәмијјәтә дә маликдир. Ҝөрүш ҝөстәрди ки, бу өлкәләр реҝионда мөвҹуд олан проблемләри өзләри һәлл едә биләрләр”.
Икитәрәфли ҝөрүшләрә тохунан дипломат Азәрбајҹанла Иран Ислам Республикасы хариҹи ишләр назирләри арасында кечирилән ҝөрүшү сәмәрәли адландырыб: “Сәрһәд-кечид мәнтәгәләриндә мүштәрәк ҝөмрүк мәнтәгәләринин ачылмасы илә бағлы сәфирләрә тапшырыглар верилиб. Бу тәҹрүбә артыг Иранла Түркијә арасында да вар. Иран Ислам Республикасы Азәрбајҹанла биртәрәфли гајдада виза режимини ләғв едиб. Һәм Иран Ислам Республикасындан, һәм дә Азәрбајҹандан гаршылыглы сәфәрләр чохалыб. Азәрбајҹандан Иран Ислам Республикасына сәфәр едәнләрин сајы 4 дәфә артыб. Әҝәр рәсми Бакы ејни аддымы атарса, Иран Ислам Республикасындан Азәрбајҹана сәфәр едәнләрин дә сајында бәрабәрлик јаранар. Буна ҝөрә дә һесаб едирик ки, 24 саат фәалијјәт ҝөстәрән сәрһәд-кечид мәнтәгәси фәалијјәт ҝөстәрмәси әһәмијјәтли оларды”.
М. Бәһрами ону да әлавә едиб ки, бир һәфтә сонра Бакыда Хәзәрјаны өлкәләрин експертләринин ҝөрүшү кечириләҹәк.
Диггәт: Хәбәрдән истифадә етдикдә мәнбәјә истинад лазымдыр
