Әһли Бејт -АБНА- хәбәр аҝентлијинин вердији хәбәрә әсасән: Полис халг һәрәкаты лидерләриндән Немәт Пәнаһлынын гардашы оғлу Пәнаһ Пәнаһлыны сахлајыб. Пәнаһ Пәнаһлынын атасы Сәмәд Пәнаһлы билдириб ки, апрелин 19-у ҝүнорта саатларында оғлу Нәсими Рајон Полис Идарәсинин 20-ҹи бөлмәсинә апарылыб.
Сәмәд Пәнаһлы билдириб ки, һадисә гардашы Немәт Пәнаһлынын Нәсими Рајон Мәһкәмәсиндә кечирилән мүһакимә просесиндән - һазырлыг иҹласындан сонра баш вериб: “Биз һамымыз мәһкәмә залындан чыхдыг. Пәнаһы машына отуран јердә тутуб бөлмәјә апарыблар. Бөлмәдә она дејибләр ки, ҝуја мәһкәмә бинасынын гаршысында хулиганлыг едиб, кимләрисә сөјүб вә саирә. Лакин о һеч кими сөјмәдијини, сәс-күј салмадығыны билдириб, изаһатында да белә гејд едиб”.
Сәмәд Пәнаһлы 20-ҹи полис бөлмәсинин рәһбәрлији илә ҝөрүшдүјүнү вурғулајыб: “Дедим ки, даһа нәсилдә адам галмады, белә чыхыр һамымыз хулиганыг, һәбсханаја салынмалыјыг. Бу сәс-күјдән сонра хәбәрдарлыг едиб Пәнаһы бурахдылар”.
Гејд едәк ки, бу ҝүн Апрелин 19-да Нәсими Рајон Мәһкәмәсиндә халг һәрәкаты лидерләриндән олмуш Немәт Пәнаһлынын вә онун јахын досту Ҹејһун Фәрзуллајевин мәһкәмәси үзрә һазырлыг иҹласы кечирилиб.
һазырлыг иҹласы ҝәрҝин шәраитдә кечиб. Бу барәдә Немәт Пәнаһлынын гардашы Сәмәд Пәнаһлы билдириб: “Просеси мүшаһидә етмәк үчүн мәтбуатдан, иҹтимаијјәт нүмајәндәләриндән ҝәлән чох иди. Амма онлары ичәри бурахмадылар. Вәкилләр просеси һәр кәсин мүшаһидә етмәсинә шәраит јарадыламасы үчүн вәсатәт глдырдылар. Немәт бәј дә чыхыш едиб билдирди ки, бу вәсатәтин тәмин олунмасы иҹтимаијјәт үчүн лазымдыр, чүнки бурада чох мәсәләјә ајдынлыг ҝәтириләҹәк. Лакин вәсатәт тәмин олунмады. Даһа сонра вәкилләр Немәт Пәнаһлынын заминә бурахылмасына даир вәсатәт галдырдылар. Дөвләт иттиһамчысы бу вәсатәтә гаршы чыхды. Һаким вәсатәти тәмин етмәди”.
Мәһкәмә просеси мајын 3-ү саат 10.00-а тәјин олунуб.
Немәт Пәнаһлы вә Ҹејһун Фәрзуллајев јанварын 8-дә бирликдә тутулублар. Онлар Ҹинајәт Мәҹәлләсинин 221.3 маддәси илә (силаһдан вә ја силаһ гисминдә истифадә едилән әшјалары тәтбиг етмәклә хулиганлыг) иттиһам едилирләр. Иттиһамын әсасында вәтәндаш Елдәниз Рзајевин шикајәти дајаныр. Шикајәтә ҝөрә, Немәт Пәнаһлы вә Ҹејһун Фәрзуллајев Бакынын Мирәли Гашгај күчәсиндә Елдәниз Рзајеви дөјүб, она јумруг вә метал әшја илә зәрбә ендирибләр. Немәт Пәнаһлы илә Ҹејһун Фәрзуллајевин мүдафиәчиләри бу иттиһамы гондарма сајыр вә онларын сијаси сифариш нәтиҹәсиндә тутулдугларыны иддиа едирләр.
Диггәт: Хәбәрдән истифадә етдикдә мәнбәјә истинад лазымдыр
