Әһли Бејт -АБНА- хәбәр аҝентлијинин вердији хәбәрә әсасән: Азәрбајҹан Ислам Партијасынын (АИП) һәбс едилмиш лидери Мөвсүм Сәмәдовун нөвбәти мәһкәмә просеси кечирилиб. Нәсими рајон мәһкәмәсиндә һаким Хумар Мәрданованын сәдрлији илә кечән просесдә АИП сәдринин һәбс мүддәти даһа 3 ај узадылыб. Бу барәдә Мөвсүм Сәмәдовун һүгугларыны мүдафиә едән вәкил Анар Гасымов мәлумат вериб. Вәкилин сөзләринә ҝөрә, тәләсик кечирилән мәһкәмә прсосеси Мөвсүм Сәмәдовун һәбс мүддәтинин узадылмасы илә јадда галыб. "Бу ҝүн Мөвсүм Сәмәдовун мәһкәмәси олду вә онун һәбс мүддәти август ајынын 8-ә гәдәр артырылды. Чох чалышдыг ки, бу һәбс мүддәтини Мөвсүм Сәмәдов азадлыгда кечирсин, анҹаг һаким бизим вәсатәтимизи тәмин етмәди. Јахын ҝүнләрдә бунунла бағлы апеллјасја шикајәти едәҹәјик"-дејә вәкил әлавә едиб.
Гејд едәк ки, бу ҝүн Азәрбајҹан Ислам Партијасынын Астара рајон комитәсинин сәдри Руфулла Ахунзадәнин дә мәһкәмәси олуб вә онун да һәбс мүддәти август ајынын 8-ә гәдәр узадылыб.
Диггәт: Хәбәрдән истифадә етдикдә мәнбәјә истинад лазымдыр
